Azərbaycan, Bakı, 05 noyabr / Trend , müxbir C.Babayeva, T.Cəfərov / Xəzər dənizinin ekologiyasının qorunması üzrə konvensiya üzvlərinin ikinci konfransı noyabrın 10-dan 12-dək Tehranda keçiriləcək.
"Konfransda ekologiyanın qorunması, dəniz sularının çirkli neftdən təmizlənməsi üçün regional əməkdaşlıq, balıqçılıqda ekologiyanın qorunması və quruda ekoloji təmizlik mövzuları müzakirə olunacaq", - çərşənbə günü Trend -a Azərbaycan Ekologiya və Təbii Sərvətlər Nazirliyinin mətbuat xidmətindən məlumat verilib.
Trend -un arayışı: Xəzər dənizi mühitinin qorunması üzrə çərçivə konvensiyası 2003-ci ilin noyabrında Tehranda imzalanıb (Tehran konvensiyası). Konvensiyanı İran və Azərbaycanın ekologiya nazirləri, Rusiya, Qazaxıstan və Türkmənistan ekologiya nazirlərinin müavinləri imzalayıblar.
Konvensiyanın məqsədi Xəzər dənizini ətraf mühitin bütün çirklənmə mənbələrindən qorumaqdan, eləcə də Xəzərin ehtiyatlarının mühafizəsi, qorunması və onlardan şüurlu istifadədən ibarətdir. Konvensiya üzvlərinin birinci konfransı ekspertlər səviyyəsində 2007-ci ildə Bakıda keçirilib.
Konfransda Xəzəryanı ölkələr tərəfindən konvensiya çərçivəsində araşdırılan 4 protokol müzakirə olunacaq - ekoloji dəyişiklikdən qorunma, çirkli neft suları ilə mübarizə üçün əməkdaşlıq, Xəzər dənizinin çirklənməsinin qarşısını almaq və ekologiyanın təsiri üzrə protokollar.
Bundan başqa, konfransda konvensiyanın əsas ofisinin üzv ölkələrin birində açılması məsələsi müzakirə olunacaq. Konvensiyanın əsas ofisi hazırda müvəqqəti olaraq Genevrədədir.
Konfransda iştirak etmək üçün Azərbaycan, Rusiya, Qazaxıstan və Türkmənistanın ekologiya nazirləri dəvət olunublar. Konfransda həmçinin beynəlxalq təşkilatların nümayəndələri, Xəzəryanı ölkələrin səfirləri və İran dövlətinin bəzi nazirləri də iştirak edəcəklər.
Nazirliyin mətbuat xidmətinin məlumatına görə, toplantıda Azərbaycanı ekologiya və təbii sərvətlər nazirinin müavini Firdovsi Əliyevin rəhbərlik etdiyi nümayəndə heyəti təmsil edəcək.
