Azərbaycan, Bakı, 06 noyabr / Trend , müxbir İ.Əlizadə/ Nərimanov rayon dindarlarının dini icması Əbu Bəkr məscidinin açılmasına kömək göstərməsi üçün cümə axşamı Qafqaz Müsəlmanları İdarəsinin (QMİ) sədri Hacı Allahşükür Paşazadəyə müraciət edib.
"Sizə bütün Qafqaz müsəlmanların şeyxi kimi müraciət edərək, qanunun və ədalətin bərqərar olması, təqibin dayandırılması, müsəlmanların müdafiəsi və Əbu Bəkr məscidinin açılması üçün öz qəti sözünüzü bildirməyinizi xahiş edirik", - Qafqaz Müsəlmanları İdarəsinin sədri Hacı Allahşükür Paşazadəyə ünvanlanan müraciətdə qeyd olunub.
Trend -un arayışı: Bu il avqustun 17-də, təqribən saat 20.50-də Bakının Ülvi Bünyadzadə küçəsində yerləşən və Nərimanov rayon dindarlarının dini icmasının toplaşdığı Əbu Bəkr məscidində naməlum şəxs tərəfindən atılmış əl qumbarasının partlaması nəticəsində iki nəfər hadisə yerində ölüb, 19 nəfərin sağlamlığına müxtəlif dərəcəli xəsarət yetirilib. Məscidin fəaliyyəti müvəqqəti dayandırılıb. Məsciddə terror aktının törədilməsində təqsirli bilinən Sumqayıt şəhər sakini Elnur Baxşıyev də həbs olunub.
Oktyabrın sonunda Bakının Nərimanov rayon məhkəməsi məscidin fəaliyyətinin bərpa edilməsi barədə qərar çıxarıb, lakin daha sonra bu qərar Əbu Bəkr məscidində təxribat təhlükəsinin olması barədə məlumatlara malik olan rayon Polis İdarəsinin iddiası əsasında dəyişdirilib.
"Son günlər, islamafoblar Əbu Bəkr məscidi ətrafında çirkli oyun quraraq onun ərazisini qanunsuz olaraq zəbt etməyə çalışırlar", - deyə müraciətdə qeyd olunub.
Müraciətdə bildirilib ki, Nərimanov rayon polisi Azərbaycanın qanunlarını və beynəlxalq müqavilələri pozaraq heç bir məhkəmə qərarı olmadan Əbu Bəkr məscidinin fəaliyyətinin bərpasına mane olurlar.
Məqalə müəllifi ilə əlaqə ünvanı: [email protected]
