Azərbaycan, Bakı, 11 noyabr / Trend / Bu gün, noyabrın 11-də Londonda "World Travel Market" ənənəvi beynəlxalq turizm sərgisinin rəsmi açılışı olub. Bu barədə Azərbaycanın Londondakı səfirliyindən məlumat verilib.
Dünyanın 200 ölkəsindən 5500-dən artıq şirkətin qatıldığı sərgidə ölkəmizi Mədəniyyət və Turizm Nazirliyinin turizm idarəsinin rəhbəri Aydın İsmiyevin başçılıq etdiyi nümayəndə heyəti təmsil edib. Bununla yanaşı, sərgidə ölkəmizin "İmprotex Travel" və "Bakı-Tur" şirkətləri də iştirak edib.
Noyabrın 11-də sərgidə Azərbaycana həsr olunmuş ayrıca stendin açılışı olub. Tədbirdə nümayəndə heyəti ilə birgə səfir F.Qurbanov da iştirak edib.
Sərginin 13 noyabra qədər öz işini davam etdirəcəyi nəzərdə tutulur.