Azərbaycan, Bakı, 08 yanvar / Trend , müxbir K. Zərbalıyeva/İnsan Haqları üzrə Avropa Məhkəməsi Azərbaycan dövləti ilə 44 iş üzrə kommunikasiya aparır.
Hüquq Maarifçiliyi
Cəmiyyətindən cümə axşamı Trend -a
verilən məlumata görə, həmin işlər
İnsan Hüquqlarının və Əsas Azadlıqların
Müdafiəsi haqqında Avropa Konvensiyasının
müxtəlif maddələrinin pozuntusu ilə
bağlıdır. Şikayətlərin əsas hissəsi
Konvensiyanın 3-cü (işgəncələrin qadağan
olunması), 6-cı (ədalətli məhkəmə
araşdırması hüququ), 10-cu (fikir ifadə etmək
azadlığı), 11-ci (yığıncaqlar və
birləşmək azadlığı), 13-cü
(səmərəli hüquqi müdafiə vasitələri
hüququ), 14-cü (ayrı-seçkiliyin qadağan
olunması) maddələri və Konvensiyanın 1 saylı
Protokolunun 1-ci (mülkiyyətin müdafiəsi) maddəsinin
pozuntusu ilə bağlıdır.
Kommunikasiyada olan işlər arasında 2005-ci ilin parlament
seçkiləri ilə bağlı Konvensiyanın 1 saylı
Protokolunun 3-cü maddəsinin (azad seçki hüququ)
pozuntusundan verilən 16 şikayət var.
Konvensiyanın 5-ci (azadlıq və toxunulmazlıq hüququ),
7-ci (qanunsuz cəzalandırılmamaq), 8-ci (şəxsi və
ailə həyatına hörmət hüququ), 9-cu (fikir, vicdan
və din azadlığı) maddələri və
Konvensiyanın 1 saylı Protokolunun 2-ci (təhsil hüququ), 7
saylı Protokolunun 2-ci (cinayət işlərinə dair
hökmlərdən ikinci instansiyaya şikayət vermə
hüququ) və 4-cü (iki dəfə məhkum edilməmək
və ya cəzalandırılmamaq hüququ) maddəsi ilə
təminat verilən hüquqların pozuntusu ilə
bağlı şikayətlər də mövcuddur.
Kommunikasiyada olan işlər sırasında Ermənistanın
2 vətəndaşı (S.Arakelyan və M.Sargsyan)
tərəfindən verilən şikayətlər də var.
Avropa Məhkəməsi Azərbaycana qarşı 16 qərar çıxarıb.
Məqalə müəllifi ilə əlaqə ünvanı:[email protected]