Azərbaycan, Bakı, 12 iyun / Trend , müxbir H.Bağırov /
İrandan Azərbaycana qaçaqmalçılıq yolu ilə narkotik vasitlərinin keçirilməsində ittiham olunan mütəşəkkil dəstə üzvlərinə prokuror iş istəyib.
Trend -un məlumatına görə, Ağır Cinayətlərə Dair İşlər üzrə Məhkəmədə keçirilən prosesdə çıxış edən dövlət ittihamçısı Nəriman Ələkbərov dəstə üzvləri Xosrov Nüsrətov və Elməddin Həmdəmovun hər birinə 12 il, Heydər Mədətovun isə 8 il azadlıqdan məhrum edilməsini istəyib.
Məhkəmə iyunun 19-da təqsirləndirilənlər barəsində çıxardığı hökmü elan edəcək.
Bu il fevralın 9-da Astara rayon sakinləri - Xosrov Nüsrətov, Elməddin Həmdəmov və Heydər Mədətov, habelə hazırda şəxsiyyəti istintaqla araşdırılan İran İslam Respublikasının vətəndaşı və qeyriləri qabaqcadan əlbir olaraq satış məqsədilə külli miqdarda narkotik vasitəni qaçaqmalçılıq yolu ilə gömrük sərhədində gömrük nəzarətindən gizli yolla İrandan Azərbaycan ərazisinə gətiriblər.
Adları çəkilən şəxslər arasında əvvəlcədən əldə olunmuş razılaşmaya əsasən, həmin İran vətəndaşının qaçaqmalçılıq yolu ilə Azərbaycan ərazisinə keçirdiyi narkotiki Elməddin Həmdəmov ondan alaraq Astara rayonunun Kicəbə kəndinə gətirib burada Xosrov Nüsrətova təhvil verib. Xosrov Nüsrətov həmin narkotikləri Kicəbə kənd sakini Heydər Mədətovun idarə etdiyi VAZ-2107 markalı avtomaşında Masallı rayonuna apararkən onlar Lənkəran şəhərində Milli Təhlükəsizlik Nazirliyinin əməkdaşları tərəfindən saxlanılıblar. Keçirilən baxış zamanı avtomaşından 50 kiloqram 171.9 qram narkotik vasitə olan həşiş aşkarlanaraq götürülüb.
Təqsirləndirilən şəxslər Cinayət Məcəlləsinin qaçaqmalçılıq (206.4-cü), qabaqcadan əlbir olan bir qrup şəxs tərəfindən və ya mütəşəkkil dəstə tərəfindən qanunsuz olaraq, narkotik vasitələri əldə etmə, saxlama və satma (234.4.1-ci) və külli miqdarda, qanunsuz olaraq narkotik vasitələri əldə etmə, saxlama və satma (234.4.3-cü) maddələri ilə ittiham olunurlar.
Məqalə müəllifi ilə əlaqə ünvanı: [email protected]