Azərbaycan, Bakı, 30 oktyabr / Trend , muxbir K.Zərbalıyeva/
Azərbaycan Ombudsmanının nümayəndələri həbsdə olan gənclərlə görüşüblər.
Ombudsman Aparatının mətbuat xidmətindən cümə günü Trend -a verilən məlumata görə, Ombudsman Elmira Süleymanovanın tapşırığı ilə qurumun əməkdaşları Bakı İstintaq Təcridxanasında saxlanılan Emin Milli və Adnan Hacızadəyə baş çəkiblər.
Həbsdə olan gənclər təcridxanada onlara lazımi şərait yaradıldığını bildirməklə yanaşı, barələrindəki məhkəmə prosesinin uzadılmasından şikayət ediblər.
Trend -un arayışı: Rəsmi məlumata görə, 2009-cu il iyulun 9-da, saat 18.00 radələrində içkili vəziyyətdə olan Adnan Hacızadə, habelə Emin Milli (Abdullayev) və daha beş nəfər "Lebonese" restoran-barında ucadan etik normadan kənar nalayiq ifadələr işlətdiklərinə görə, onlara irad tutan vətəndaşlar Vüsal Məmmədov və Babək Hüseynova qarşı heç bir əsaslı səbəb olmadan fiziki zor tətbiq etməklə qərəzli xuliqanlıq hərəkətlərinə yol veriblər.
Onlar xuliqanlıqda (221) və qəsdən sağlamlığa az ağır zərər vurmaqda (127) ittiham olunurlar. Gənclər ittihamları qəbul etmirlər və həbslərinin sifarişli olduğunu deyirlər.
Məqalə müəllifi ilə əlaqə ünvanı: [email protected]
