Azərbaycan, Bakı, 3 mart / Trend , müxbir K.Zərbalıyeva/
Azərbaycan Hökuməti ilə Avropa İnsan Hüquqları Məhkəməsi arasında daha bir şikayətlə bağlı kommunikasiya başlayıb.
Hüquq Maarifçiliyi Cəmiyyətindən çərşənbə günü Trend -a verilən məlumata görə, 2000-ci ilin sentyabrın 1-də nikaha daxil olan Azərbaycan vətəndaşı M.Rəsulov ailə qurduqdan 3 ay sonra nikaha xitam verilməsi tələbi ilə məhkəməyə müraciət etdiyi zaman məlum olub ki, onun arvadı hamilədir. Rəsulov arvadının ona xəyanət etdiyini və doğulacaq uşağın da onun olmadığını iddia edib. O, özünü uşağın atası hesab etmədiyinə görə, atalığın mübahisələndirilməsi və nikaha xitam verilməsi tələbi ilə Əzizbəyov Rayon Məhkəməsinə müraciət edib.
21 iyun 2001-ci ildə, məhkəmə proseslərinin davam etdiyi müddətdə Rəsulovun arvadı oğlan uşağı dünyaya gətirib və uşaq Ərizəçinin övladı kimi qeydiyyatdan keçirilib. Atalığın müəyyən edilməsi məqsədilə təyin edilən bioloji ekspertizanın nəticəsində Səhiyyə Nazirliyi Ərizəçinin uşağın bioloji atası olması barədə rəy verib.
Bioloji ekspertizanın nəticəsi məlum olduqdan sonra məhkəmə qəti nəticə əldə etmək məqsədilə DNT testi təyin edib. Səhiyyə Nazirliyinin ekspertinin rəyində, DNT testinin nəticələrinə əsasən göstərilib ki, Rəsulov uşağın bioloji atası deyil. Bioloji ekspertiza və DNT testi arasında olan ziddiyyəti aradan qaldırmaq məqsədilə təyin edilən əlavə ekspertiza nəticəsində müəyyən edilib ki, DNT testinin nəticələri daha dəqiq və əsaslı olduğundan o, bioloji ekspertizanın nəticələrindən üstün tutulmalıdır.
2006-cı il mayın 11-də Əzizbəyov Rayon Məhkəməsi ərizəçinin atalıqla bağlı iddiasını təmin edərək, onun uşağın bioloji atası olmaması barəsində qətnamə çıxarıb.
Hər iki tərəf Əzizbəyov Rayon Məhkəməsinin qətnaməsindən Bakı Apelyasiya Məhkəməsinə şikayət verib. Şikayətdə Rəsulov boşanma tələbini irəli sürüb, cavabdeh isə atalığın mübahisələndirilməsinin nəticələri ilə razılaşmayıb.
2007-ci ilin sentyabrın 4-də Bakı Apelyasiya Məhkəməsi Əzizbəyov Rayon Məhkəməsinin qətnaməsini ləğv edərək iş üzrə yeni qətnamə çıxarıb. Məhkəmə öz qərarını belə əsaslandırıb ki, Rəsulov və cavabdeh hamiləliyin olduğu müddətdə birgə yaşayıblar, bu da, uşağın atasının məhz Ərizəçi olduğu qənaətinə gəlməyə əsas verir. Məhkəmə ekspert rəylərini nəzərə almayıb və bunu həmin rəylərin işin digər halları ilə ziddiyyət təşkil etməsi ilə əlaqələndirib.
2007-ci il noyabrın 20-də Ali Məhkəmə Rəsulovun Apelyasiya Məhkəməsinin qərarından verdiyi kassasiya şikayətini rədd edib.
Rəsulov Avropa Konvensiyasının 6-cı maddəsi ilə təminat verilən ədalətli məhkəmə araşdırması hüququnun pozuntusu ilə bağlı Avropa Məhkəməsinə şikayət ünvanlayıb. Bu işdə atalığın müəyyən olunması ilə bağlı məhkəmə araşdırmasının ədalətli aparılmaması mübahisələndirilir.
