Azərbaycan, Bakı, 23 avqust /Trend, müxbir T.Hacıyev/
Türkiyə-Azərbaycan Dərnəkləri Federasiyasının təşəbbüsü ilə Ankarada yeni diaspor təşkilatı - "Ankara Azərbaycan Evi"nin təqdimatı olub. Bu barədə bazar ertəsi Trend-ə Diasporla İş üzrə Dövlət Komitəsinin mətbuat xidmətindən məlumat verilib.
Məlumata görə, yeni təşkilata Ərdoğan Çeçen rəhbərlik edəcək. Təqdimat mərasimində çıxış edən Diasporla İş üzrə Dövlət Komitəsinin aparat rəhbəri Nəriman Qurbanov, Türkiyə-Azərbaycan Dərnəkləri Federasiyasının (TADEF) sədri Bilal Dündar, Türkiyə-Azərbaycan Dərnəyinin sədri Sinan Oğan bildiriblər ki, qardaş ölkədə fəaliyyət göstərən bütün dərnəklər fəaliyyətini birləşdirməli və əlaqələndirməlidirlər.
Onlar Azərbaycan həqiqətlərinin təkcə Türkiyədə deyil, habelə dünyanın müxtəlif ölkələrində təbliği üçün bütün imkanlardan, xüsusilə müasir texnologiyanın nailiyyətlərindən istifadə etməlidirlər. Dağlıq Qarabağ problemi, Xocalı soyqırımı, azərbaycanlıların soyqırımı günü və digər mühüm tədbirlərin Azərbaycanın və Türkiyənin diplomatik nümayəndəlikləri ilə sıx əməkdaşlıq şəraitində keçirilməsi də diaspor təşkilatlarımızın diqqət mərkəzində olmalıdır.
TADEF-in təşəbbüsü ilə daha bir təşkilat - "Əskişəhir Azərbaycan Evi"nin də təqdimatı keçirilib.
