Azərbaycan, Bakı, 1 sentyabr /Trend, müxbir S.Ağayeva/
Dahi Azərbaycan bəstəkarı Üzeyir Hacıbəyovun 135 illik yubileyi münasibətilə Vyanada böyük konsert təşkil olunacaq.
Sentyabrın 22-də dahi Azərbaycan bəstəkarının heykəlinin qoyulduğu paytaxt Vyananın mərkəzi parklarından birində - Dunay parkda Üzeyir Hacıbəyovun yubileyinə həsr olunmuş konsert təşkil olunacaq. Bu barədə Trend-ə çərşənbə axşamı Azərbaycanın Avstriyadakı səfiri Fuad İsmayılov məlumat verib.
Azərbaycan və Avstriya musiqiçilərinin iştirakı ilə keçiriləcək konsertin bəstəkarın heykəli yanında təşkil olunması planlaşdırılır.
Bu məqsədlə aralarında Fərhad Bədəlbəyli, Ramiz Quliyev, dirijor Əyyub Quliyev, müğənnilər Fəridə Məmmədova və Azər Zeynalov da olmaqla, Azərbaycan musiqiçilərindən ibarət nümayəndə heyətinin Vyanaya səfəri nəzərdə tutulub.
Azərbaycanlı musiqiçilərlə yanaşı, konsertdə bəstəkarın əsərlərini ifa edəcək Vyana kamera orkestri də çıxış edəcək.
Üzeyir Hacıbəyov dahi bəstəkar, Azərbaycan musiqi mədəniyyətinin klassikidir. Onun yaradıcılığı milli musiqi incəsənətinin inkişafında başlıca rol oynayıb. Azərbaycanın peşəkar musiqi incəsənətinin yaranması və inkişafı, bir çox janrların yaranması və təkamülü, bir sıra peşəkar kollektivlərin yaranması Hacıbəyovun adı ilə bağlıdır. Üzeyir Hacıbəyov tərəfindən bütün Yaxın Şərqdə ilk milli musiqili teatr yaranıb.
İlk operanın, musiqili komediyaların, bir çox mahnıların, kantata-oratoriya musiqisinin, xalq çalğı alətləri orkestri üçün əsərlərin, eləcə də ilk Azərbaycan klassik operasının - Azərbaycan musiqi incəsənətinin incisi sayılan "Koroğlu"nun müəllifidir. Hacıbəyov milli mədəniyyətin inkişafında ictimai xadim, dramaturq, alim, folklorşünas, pedaqoq kimi də görkəmli rol oynayıb. Onun musiqi təhsilinin, musiqi elminin yaranması və inkişafında, geniş kütlənin maarifləndirilməsində də böyük xidmətləri var.