Azərbaycan məhkəmələri həbs-qətimkan tədbiri seçərkən qanunun tələblərinə riayət etməlidirlər. Bunu cümə günü Bakıda Trend-ə Azərbaycanın İnsan Haqları üzrə Avropa Məhkəməsindəki hakimi Xanlar Hacıyev bildirib.
"Həbs-qətimkan tədbiri müstəsna hallarda seçilməlidir. Məhkəmə özünə hörmət etməlidir və bu məsələdə özünü bitərəf göstərməlidir", - Hacıyev bildirib.
Azərbaycan Ali Məhkəməsinin Plenumu məhkəmələrə həbs-qətimkan tədbirinin tətbiqi ilə bağlı qərar qəbul edərkən qərarların əsaslandırılmasını və digər qətimkan tədbirlərinin tətbiqini məhkəmələrə tövsiyyə edib. Məhkəmə-Hüquq Şurası tərəfindən həbs-qətimkan tədbiri barədə qərarlarını əsaslandırılmamış 10-dan artıq hakimi cəzalandırıb.
Hakimin sözlərinə görə, son illər Azərbaycandan Avropa Məhkəməsinə göndərilən işlərdə İnsan hüquq və azadlıqlarının müdafiəsi haqqında Avropa Konvensiyasının 5-ci maddəsinin tətbiqində (həbs-qətimkan tədbirinin seçilməsi və uzadılması ilə bağlı) problemlər müşahidə olunur.
Hacıyev Konstitusiya Məhkəməsinin qərarlarında bu maddənin şərhinin verilməsini vacib sayıb.
Azərbaycanın hüquq-mühafizə sistemindəki nöqsanlara toxunan Hacıyev bildirib ki, Avropa Məhkəməsinə daxil olan işlərdə məhkəmə qərarlarının icra olunmaması, əsaslandırılmaması, hüquq-mühafizə orqanlarının təqsirsizlik prezumsiyasını pozması hallarına rast gəlinir.
Hakim Apelyasiya və Ali məhkəmənin qərarlarının dərc olunmasını vacib sayıb və bildirib ki, vətəndaşlar həmin qərarlar barədə məlumatlı olmaqla yanaşı eyni xarakterli işlərdə məhkəmələrin necə qərar qəbul etmələrini bilməlidirlər.
Hacıyev qeyd edib ki, hüquq-mühafizə orqanları cinayət işinin istintaqı mərhələsində həmin faktla bağlı ictimaiyyətin məlumatlandırılması zamanı şəxsin təqsirsizlik məsələsini əvvəlcədən həll etməməlidirlər.
"Çox vaxt hüquq-mühafizə orqanları istintaqın gedişi ilə bağlı cəmiyyətə məlumat verərkən, şəxsin təqsirlilik məsələsini həll etmiş olurlar. Bəzən ayrı-ayrı hüquq-mühafizə orqanları cinayət hadisəsi ilə bağlı birgə məlumat yayırlar. Nəzərə almaq lazımdır ki, hər bir hüquq-mühafizə orqanının öz funksiyası var, fərqli funksiyalara malik qurumların birgə məlumat yayması düzgün deyil", - Hacıyev vurğulayıb.