Azərbaycan, Bakı, 15 avqust /Trend, müxbir M.Əliyev/
"Eurovision" mahnı müsabiqəsinə hazırlıqlar üçün könülüllülər və digər işçi heyəti işə mərhələlərlə cəlb olunacaq. Bunu Trend-ə bazar ertəsi İctimai Televiziya və Radio Yayımları Şirkətinin İctimaiyyətlə əlaqə və monitorinq şöbəsinin müdiri Tahir Məmmədov bildirib.
Onun sözlərinə görə, ümumi layihəyə könüllülər, sürücülər, texniki heyət, xarici ekspertlər, televiziya heyəti, səhnədə çıxış edəcək şəxslərə xidmət edənlər və sair personaldan ibarət minlərlə şəxs cəlb olunacaq.
"Layihə üzrə hər mərhələdə həmin mərhələyə uyğun heyət cəlb olunur və 2-3 min insan birdən tapşırıq alıb işə başlamayacaq. "Eurovision həftəsi" adlanan həftədə isə bütün cəlb olunmuş heyət çalışacaq", - Məmmədov deyib.
Onun sözlərinə görə, hazırda İctimai Televiziyanın heyəti, Avropa Yayım Birliyindən bu işləri koordinasiya edən şəxslər cari işləri aparırlar, həmçinin ölkədəki ümumi hazırlıqla bağlı cəlb olunan təşkilatların cavabdeh şəxsləri işə cəlb ediliblər.
İTV rəsmisi könüllülərin cəlb olunacağını da bildirərək qeyd edib ki, hazırda bununla bağlı konkret qərar qəbul olunmayıb, prinsiplər müəyyənləşdirilməyib.
"İstər Avropa Yayımlar Birliyi, istər İTV tərəfindən bütün mərhələlərlə bağlı ictimaiyyətə geniş məlumatlar veriləcək", - o vurğulayıb.
"Eurovision"ın baş prodüseri Jon Ola Sand və müsabiqənin təşkilati rəhbəri Sietse Bekker ötən həftə Azərbaycanda səfərdə olarkən "Eurovision" mahnı müsabiqəsinə hazırlıqlara mümkün qədər çox şəxsin cəlb edilməsini tövsiyə ediblər.
Azərbaycan təmsilçiləri Eldar Qasımov və Nigar Camal (Ell/Nikki) " Running Scared" mahnı sı ilə " Eurovision 2011" mü sabiqə sinin qalibi olub.
56-cı dəfə təşkil olunan yarışmanın şüarı "Feel Your Heart Beat!" (Öz ürəyinin döyüntüsünü hiss et) idi. Müsabiqənin sonunda sms-səsvermə və professional juri seçimi nəticəsində "Eurovision 2011"-in qalibi 221 xal toplayan Azərbaycan oldu (Ell/Nikki - "Running Scared"). Bununla da Azərbaycan "Eurovision 2012" müsabiqəsini keçirmək hüququnu qazanıb.