Azərbaycan, Bakı, 19 sentyabr /Trend, müxbir İ.İsabalayeva/
Bakı Şəhəri Təhsil İdarəsi (BŞTİ) məktəb bufetlərində uşaqların qidalanmasının daha yaxşı təşkil olunması ilə bağlı yeni təklif irəli sürür. İdarənin ictimaiyyətlə əlaqələr sektorunun müdiri Zəminə Əliqızı bazar ertəsi Trend-ə bildirib ki, məktəblərin bufetlərinin ərzaqla təmini bu idarənin səlahiyyətinə daxil deyil və onlar bu prosesə müdaxilə etmirlər. Eyni zamanda, bufetlərdə satılan ərzaqların keyfiyyətini də bu idarə müəyyənləşdirmir.
Bununla belə, məktəb bufetlərində şagirdlərin sağlamlığı üçün daha xeyirli olan qidaların satışının təşkili ilə bağlı təklif reallaşa bilər. Əliqızının fikrincə, məktəblərdə uşaqlara isti yemək, çay, süd, ağartı vermək olar. Amma bu məsələnin dövlət tərəfindən maliyyələşdirilməsi mümkün olmadığı üçün valideyn-müəllim assosiasiyaları (VMA) olan məktəblərdə bu yenilik həyata keçirilə, uşaqlara daha sağlam qidalar verilə bilər.
Əliqızının sözlərinə görə, bunun üçün ilk növbədə valideynlər bu işin şəffaflığına əmin olmalı və buna öz razılıqlarını bildirməlidirlər. Bu halda işin təşkili üçün VMA-ların hesablarında toplanan vəsaitlərdən istifadə etmək olar.
"İbtidai sinif şagirdləri dərsdən sonra məktəbdə qalaraq müəllimləri ilə dərs tapşırıqlarını yerinə yetirirlər. Təbii ki, uşaqlar məktəbə gələndə səhər yeməyini ya ümumiyyətlə, ya da normal yemirlər. Məktəblərdə isə onlara isti yeməklər verilmir, uşaqlar "fast-food"la qidalanırlar. Bütün bunlar uşaqların sağlam qida qəbul etməməsinə gətirib çıxarır. Bu da sonda onların sağlamlığına mənfi təsir göstərir", - sektor müdiri qeyd edib.
İdarə rəsmisi artıq MDB, o cümlədən Avropa ölkələrinin bir çox məktəblərində uşaqların qidalanmasının çox ciddi problemə çevrildiyini bildirib.
"Artıq dünyanın nəhəng ölkələrində məktəbyaşlı uşaqların kütləvi piylənməsi prosesi baş verir. Bunların da özəyində uşaqların düzgün qidalanmaması, "fast-food"dan, qazlı içkilərdən çox istifadə etmə dayanır. Bu günlərdə Türkiyənin məktəblərindəartıq qazlı içkilərdən istifadə qadağan edilib", - Əliqizi deyib.
O hesab edir ki, bu məsələ Azərbaycanın daxilində də sosial tələb kimi gündəmə gəlməli, valideynlər özləri bu məsələdən narahat olduqlarını bildirməli və məktəblərdə uşaqlarının qidalanmasının yaxşı təşkili məsələsini qaldırmalıdırlar. Amma hələ ki, Azərbaycanda bu tələb hiss edilmir.
Əliqızının sözlərinə görə, real tələb hiss etmədiklərindən, hələlik bu təşəbbüslə bağlı heç bir məktəbə təklif və ya tövsiyə də verməyiblər.
Valideynlər övladlarının məktəblərdə qidalanmasının yaxşı təşkil olunması məsələsini qaldırsalar, BŞTİ bu istiqamətdə müəyyən iş görməyə hazırdır.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
