Azərbaycan, Bakı, 30 mart / Trend müxbir K.Zərbalıyeva/
Bakı-Şamaxı-Yevlax magistral yolunun Ağsu aşırımı ərazisi bu gün günün ikinci yarısında minik avtomobilləri üçün açılacaq.
Ağsu rayon İcra Hakimiyyəti başçısının müavini, rayon Fövqəladə Hallar Komissiyasının sədri İqbal Mikayılov Trend-ə bildirib ki, yolun açılması üçün hazırlıq işləri görülür və günün ikinci yarısında yol minik avtomobilləri üçün açılacaq.
Qeyd edək ki, Şamaxının Muğanlı kəndindən başlayaraq Bakı-Şamaxı-Yevlax magistral yolunun 131-133-cü km-liyində (Muğanlı kəndi ərazisində) yol tamamilə çöküb. Həmin avtomobil yolunun Ağsu aşırımı ərazisində - 140, 141, 142, 146 km-lərində sürüşmələr olduqca aktivləşib, yollarda çatlar yaranıb, Muğanlı kəndinin girəcəyində sürüşmə yolu çökdürüb.
Bununla əlaqədar olaraq İsmayıllı-Ağsu aşırımı yolunda nəqliyyatın hərəkəti müvəqqəti dayandırılıb, yol tamamilə bağlanıb.
Yolun bağlanması ilə əlaqədar olaraq Ağsunun 11 kəndi ilə əlaqəsi kəsilib və həmin kəndlərə gediş-gəliş İsmayıllı rayonu ərazisindən keçməklə mümkündür. Bu isə yolu 100 kilometr uzadıb.
Məlumata görə, baş nazirin müavini Abid Şərifov bu gün Ağsu və şamaxıdakı sürüşmə sahələrinə baxış keçirəcək.