...

Tanınmış fotomüxbir Əjdər Nağıyev vəfat edib

Cəmiyyət Materials 2 Aprel 2012 16:51 (UTC +04:00)
Bu gün "Azadlıq" qəzetinin fotomüxbiri Əjdər Cəfər oğlu Nağıyev vəfat edib.
Tanınmış fotomüxbir Əjdər Nağıyev vəfat edib

Azərbaycan, Bakı, 2 aprel /Trend, müxbir E.Mehdiyev/

Bu gün "Azadlıq" qəzetinin fotomüxbiri Əjdər Cəfər oğlu Nağıyev vəfat edib.

Mətbuat Şurasından bazar ertəsi Trend-ə verilən məlumata görə, o, cəmi 57 il yaşadı, yaradıcılığının daha da çiçəkləndiyi bir vaxtda dünyasını dəyişdi.

Nağıyev 1955-ci ildə İsmayıllı rayonunun füsunkar Qoydan kəndində dünyaya göz açıb. Uşaqlıqdan meylini foto sənətinə salan Əjdərin müxtəlif mətbu orqanlara ünvanladığı təsvirlərdə əsasən təbiət gözəlliklərinin əks olunması da bu vurğunluqdan qaynaqlanırdı. Lakin mövzu dairəsi get-gedə genişləndi. 1988-ci ildə isə xalqımız azadlıq mücadiləsinə qalxanda təqdim etdiyi nümunələrdə dövrün gerçəklikləri canlandı.

Səmimi insan, peşəkar fotoqraf imicini qazanan Əjdərin duyum dünyası yüksək zövqündən, hadisələrə həssaslıqla yanaşma manerasından xəbər verirdi. Əsas iş yeri "Azadlıq" qəzeti olsa da, onun fotoşəkilləri ölkəmizin bir çox mətbu nəşrlərinin səhifələrini bəzəyirdi. Yüksək zövqün, məsuliyyət hissinin nəticəsi idi ki, müxtəlif jurnallar onu həvəslə əməkdaşlığa dəvət edirdilər.

Əjdərin peşəkarlığı iştirakçısı olduğu bütün müsabiqələrdə bir qayda olaraq dəyərləndirilirdi. Onun layiq görüldüyü diplomlar və digər mükafatların zəngin çeşidi yaradıcılıq axtarışlarının uğurlu bəhrələri kimi xatirələrdə qalıb.

O, qısa, lakin mənalı ömür yolu yaşadı. Allah rəhmət eləsin, qəbri nurla dolsun!

Xəbər lenti

Xəbər lenti