Azərbaycan, Bakı, 17 aprel / Trend müxbir İ.İsabalayeva/
Ümummilli lider Heydər Əliyevin anadan olmasının 89-cu ildönümü münasibətilə ümumi təhsil məktəbləri və ilk peşə ixtisas təhsili müəssisələrinin şagirdləri üçün keçirilən inşa yazı müsabiqəsinin yekun mərhələsi baş tutub.
Trend-in məlumatına görə, bununla bağlı çərşənbə axşamı keçirilən tədbirdə çıxış edən təhsil naziri Misir Mərdanov bildirib ki, müsabiqədə ümumi təhsil məktəblərinin VII-XI sinif və ilk peşə ixtisas təhsili müəssisələrinin şagirdləri iştirak edib.
İnşa yazı müsabiqəsi Heydər Əliyev Fondu, Azərbaycan Həmkarlar İttifaqları Konfederasiyası, Təhsil, Rabitə və İnformasiya Texnologiyaları nazirliklərinin təşkilatçılığı ilə keçirilir.
Müsabiqə 3 mərhələdə - məktəb; rayon, şəhər və respublika mərhələlərində həyata keçirilib. Müsabiqənin iki mərhələsi aprelin əvvəllərində yekunlaşıb. Müsabiqənin son, yəni respublika mərhələsində 114 şagird iştirak edir. Nazir deyib ki, müsabiqə qalibləri mayın 7-də mükafatlandırılacaqlar.