Azərbaycan, Bakı, 13 dekabr /Trend, müxbir K.Zərbalıyeva/
Azərbaycanda gender bərabərliyinin təmin olunması və ailənin inkişaf etdirilməsi məqsədilə yeni sənədlər qəbul olunacaq. Trend-in məlumatına görə, bu barədə "Azərbaycan 2020: gələcəyə baxış" İnkişaf Konsepsiyasında qeyd olunur.
Konsepsiyada deyilir ki, gender bərabərliyinin təmin olunması və ailənin inkişaf etdirilməsi sahəsində dövlət siyasətinin əsas istiqamətlərini gender zorakılığı halların qarşısının alınması üzrə tədbirlərin həyata keçirilməsi, qadınlar və kişilər üçün əmək bazarında bərabər imkanların yaradılması, qadınların işdə irəli çəkilmə, rəhbər vəzifə tutmaq imkanlarının daha da genişləndirilməsi təşkil edəcək.
Ana və uşaqların sosial müdafiəsi və mühafizəsinin gücləndirilməsi, "Ailə öhdəlikləri olan işçilər haqqında" Konvensiyasına uyğun olaraq işləyən valideynlər üçün uşaq baxımının asanlaşdırılması, uşaq bağçalarının sayının artırılması və həmçinin, ailə planlaşdırma xidmətlərinin inkişaf etdirilməsi dəstəklənəcək.
Qeyd edilən istiqamətlərin reallaşdırılması məqsədilə "Azərbaycan ailəsi strategiyası"nın, gender bərabərliyi üzrə Milli Fəaliyyət Planının, Uşaq Məcəlləsinin və Milli Uşaq Strategiyasının hazırlanması nəzərdə tutulur.
Bununla yanaşı, "Ailə psixoloqu" institutu, məişət zorakılığına məruz qalmış qadınlar üçün yardım mərkəzləri və sığınacaqlar, həmçinin ölkədə zorakılıq, təhsildən yayınma və erkən nikah halları üzrə monitorinq sistemi yaradılacaq.
