Azərbaycan, Bakı, 14 yanvar /Trend/
Ötən il Əmlak Məsələləri Dövlət Komitəsinin strukturuna daxil olan qurumlarda işləyən 16 dövlət qulluqçusu etik davranış qaydalarının pozulmasına, əmr, sərəncam, tapşırıqların və digər əmək funksiyalarının icrasında yol verdikləri nöqsanlara görə intizam məsuliyyətinə cəlb olunub.
Dövlət Komitəsindən Trend-ə verilən məlumata görə, 10 işçiyə töhmət verilib, 6 işçi işdən azad olunub.
Etik davranış qaydalarını və onlara əməl olunması ilə bağlı təminatları konkretləşdirmək məqsədilə komitədə "Əmlak Məsələləri Dövlət Komitəsinin aparatında və onun strukturuna daxil olan qurumlarda işləyən dövlət qulluqçularının etik davranış Qaydaları" təsdiq edilib.
Bu Qaydalara uyğun olaraq, komitədə işləyən dövlət qulluqçularının xidməti davranışlarının qanunvericiliklə müəyyən olunan etik davranış qaydalarına uyğunluğuna nəzarətin təmin edilməsi, etik davranış qaydalarının əməl edilməsi vəziyyətinin öyrənilməsi və onun təhlilinin aparılması mütəmadi olaraq həyata keçirilir. Eyni zamanda, etik davranış məsələləri komitənin kollegiya iclaslarında və müşavirələrdə diqqətdə saxlanılır və bu məqsədlə icrası zəruri olan tapşırıqlar verilir. Aparılmış təhlillərin və verilmiş tapşırıqların icrasının nəticəsi olaraq pozuntu hallarına yol vermiş dövlət qulluqçuları barəsində intizam tənbehi tədbirləri görülüb və bu barədə məlumatlar Azərbaycan Prezidenti yanında Dövlət Qulluğu Məsələləri üzrə Komissiyaya təqdim edilib.
Əmlak Məsələləri Dövlət Komitəsinin ərazi şöbələrində işləyən dövlət qulluqçularının xidməti davranışlarının etik davranış qaydalarına uyğunluğuna nəzarətin təmin edilməsi və bu sahədə maarifləndirmə işlərinin aparılması məqsədilə komitənin aidiyyəti şöbələrinin əməkdaşları respublikanın şəhər və rayonlarına ezam ediliblər.
Bununla yanaşı, komitədə çalışan dövlət qulluqçuları üçün 9 və 22 dekabr 2012-ci il tarixlərində "Dövlət qulluqçularının etik davranış qaydaları" mövzusunda seminarlar keçirilib.
Komitənin rəsmi internet səhifəsində "Etik davranış qaydaları" bölməsi yaradılıb və hazırda həmin internet səhifəsi vasitəsilə birbaşa müraciətlərin və elektron ərizələrin qəbul edilməsi imkanları mövcuddur. Etik davranış qaydaları ilə bağlı müraciətlərin qəbulu, baxılması və cavablandırılmasında çevikliyi və şəffaflığı təmin etmək məqsədilə komitədə və tabeliyində olan qurumlarda müraciətlərin elektron poçt ünvanı vasitəsilə qəbulu və cavablandırılması həyata keçirilir.