Azərbaycan, Bakı, 5 iyun /Trend, müxbir İ.İzzət/
Bakı Şəhər Baş Polis İdarəsi (BŞBPİ) son günlər paytaxtda qanunsuz keçirilməsinə cəhd edilən aksiyalarda polislə jurnalistlər arasında yaşanan anlaşılmazlıqdan narahatlığını ifadə edib.
BŞBPİ-nin mətbuat xidmətindən Trend-ə verilən məlumata görə, bu məsələlər idarə rəhbərliyinin diqqət mərkəzindədir:
"Hazırda hadisə ilə bağlı araşdırma aparılır və aparılan araşdırmalar başa çatdırıldıqdan sonra müvafiq tədbirlər görüləcək. Qanunu pozanlar cəzasını alacaqlar".
Qeyd edək ki, bəzi KİV-lərdə Türkiyədə İstanbulda Gezi parkının sökülməsinə qarşı başlamış kütləvi nümayişlərə dəstək olaraq Bakıda keçirilən aksiyaları işıqlandırarkən bir sıra jurnalistlərin (ANS TV əməkdaşları Elnarə Məmmədova Firuz Ağayev və RATİ əməkdaşları - Rasim Əliyev və Mehman Hüseynov) hüquq mühafizə orqanları əməkdaşlarının təzyiqinə məruz qaldığı haqda məlumatlar yer alıb.