Azərbaycan, Bakı, 1 avqust /Trend, müxbir M.Əliyev/
Türkiyə Silahlı Qüvvələrinin Gülhanə Hərbi Tibb Akademiyasının gizir feldşer məktəbinə (orta ixtisas məktəbi) qəbul olmaq istəyən abituriyentlər üçün müsabiqə keçirilir.
Tələbə Qəbulu üzrə Dövlət Komissiyasından (TQDK) Trend-ə verilən məlumata görə, Azərbaycan ilə Türkiyə arasında hərbi təhsil sahəsində bağlanmış müqaviləyə əsasən, Azərbaycan Daxili İşlər Nazirliyinin Daxili Qoşunlarının xətti ilə 2013/2014-cü tədris ili üçün Türkiyənin Gülhanə Hərbi Tibb Akademiyasının gizir feldşer məktəbinə (orta ixtisas məktəbinə) iki illik təhsil proqramı üzrə müsabiqə elan edilir.
Müsabiqədə 2013-cü ildə IV ixtisas qrupu üzrə qəbul imtahanlarında 300-dən yüksək bal toplamış oğlan abituriyentlər iştirak edə bilərlər.
Qeyd edək ki, müsabiqədə iştirak edənlər arasından 1 nəfər gəncin seçilib iki il müddətinə Akademiyanın gizir feldşer məktəbinə (orta ixtisas məktəbinə) göndərilməsi nəzərdə tutulub.
Müsabiqədə iştirak etmək istəyənlər avqustun 2-dən 7-dək hər gün (bazar günü istisna olmaqla) saat 10:00-dan 17:00-dək TQDK-ya (ünvan: Akademik Həsən Əliyev küçəsi, 17; tel: (012) 440 30 09 ; email: [email protected]) müraciət edə bilərlər.