Azərbaycan, Bakı, 19 dekabr /Trend/
Bu gün Bakı Dövlət Universitetində "Aşıq Şəmşir" Mədəniyyət Ocağı İctimai Birliyinin Bakı Dövlət Universiteti ilə birgə təşkil etdiyi, görkəmli yazıçı və ədəbiyyatşünas Mir Cəlal Paşayevin anadan olmasının 105 illiyinə həsr olunmuş "Mir Cəlal görkəmli yazıçı və ədəbiyyatşünas kimi" mövzusunda məqalə müsabiqəsinin qaliblərinə mükafatların təqdim olunması mərasimi keçirilib.
BDU-nun Mətbuat və informasiya şöbəsindən Trend-ə verilən məlumata görə, tədbiri girişi sözü ilə açan universitetin rektoru, akademik Abel Məhərrəmov XX əsr milli ədəbi-bədii fikir tariximizdə müstəsna rol oynamış Mir Cəlal Paşayevin həyat və yaradıcılığından bəhs edib. Qeyd edib ki, Mir Cəlal Paşayev ədəbiyyatımızın inkişafı və onun məzmunca zənginləşməsində mühüm rol oynayıb.
Rektor habelə böyük ədibin tədqiqatçı alim kimi fəaliyyətindən də bəhs edib.
Sona İlahiyyat fakültəsinin dekanı, professor Vasim Məmmədəliyev, BDU-nun kafedra müdiri, dosent Ədibə Paşayeva, Jurnalistika fakültəsinin dekanı, professor Şamil Vəliyev, Mir Cəlalın tədqiqatçısı, professor Şirindil Alışanlı, "Aşıq Şəmşir" Mədəniyyət Ocağı İctimai Birliyinin sədri Qənbər Şəmşiroğlu da görkəmli alim haqqında danışıblar. Bildiriblər ki, Mir Cəlal Paşayev xalq yaradıcılığı ilə klassik bədii irsin qabaqcıl ənənələrinin vəhdətini yeni formada yaşadan görkəmli yazıçıdır.
Sonra "Mir Cəlal görkəmli yazıçı və ədəbiyyatşünas kimi" mövzusunda məqalə müsabiqəsinin qalibləri elan edilib və onlara İctimai Birlik adından diplom və pul mükafatları təqdim olunub. 1-ci yerin qalibi Jalə Abdullayeva, 2-ci yerin qalibi Nihal Qüdrətli və 3-cü yerin qalibi Anar Fərəcov olublar. Daha 10 nəfər həvəsləndirici mükafata layiq görülüb.
