...

Xarici İşlər Nazirliyi jurnalistləri milli mətbuatın yaranmasının 140 illik yubileyi münasibətilə təbrik etdi

Cəmiyyət Materials 21 İyul 2015 10:43
Azərbaycan Xarici İşlər Nazirliyi mətbuat təmsilçilərini peşə bayramları münasibətilə təbrik edib.
Xarici İşlər Nazirliyi jurnalistləri milli mətbuatın yaranmasının 140 illik yubileyi münasibətilə təbrik etdi

Trend-i buradan izləyin

Azərbaycan, Bakı, 21 iyul /Trend/

Azərbaycan Xarici İşlər Nazirliyi mətbuat təmsilçilərini milli mətbuatın yaranmasının 140 illik yubileyi münasibətilə təbrik edib.

Trend-in məlumatına görə, təbrikdə bildirilir ki, Azərbaycan Prezidenti İlham Əliyevin 2 iyun 2015-ci il tarixli Sərəncamı ilə Azərbaycan milli mətbuatının yaranmasının 140 illik yubileyi ölkə miqyasında geniş şəkildə qeyd olunur.

Azərbaycan xalqının Ümummilli lideri Heydər Əliyevin "Jurnalist əməyi qeyri-adi, olduqca zəhmətli, çox səylər göstərilməsini, hətta cəsurluq, hünər, fədakarlıq, öz peşəsinə vurğunluq tələb edən əməkdir" kəlamı milli mətbuat nümayəndələrinin əməyinə verilən yüksək qiymətin bariz nümunəsidir.

Milli mətbuatımızın ilk nümunəsi kimi 1875-ci il iyulun 22-də görkəmli ziyalı, publisist Həsən bəy Zərdabi tərəfindən Azərbaycan dilində nəşr olunmağa başlamış və ictimai maarifçiliyi hədəfləmiş "Əkinçi" qəzetindən əsasını götürən müasir Azərbaycan mətbuatı ölkəmizin bütün sahələrdə əldə etdiyi nailiyyətlərinə uyğun olaraq, öz inkişaf dövrünü yaşayır.

Milli jurnalistikanın müstəqil inkişafına dövlət qayğısının nümunəsi olaraq, "Azərbaycan Respublikasında kütləvi informasiya vasitələrinin inkişafına dövlət dəstəyi Konsepsiyası"ndan irəli gələn vəzifələrin icrası məqsədilə Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu ardıcıl və məqsədyönlü fəaliyyət göstərir. Mətbuat Şurası uğurla mətbuat, cəmiyyət və dövlət arasında əlaqələndirici rolunda çıxış edir.

Bu gün milli jurnalistikanın milli-mənəvi dəyərlərin təşviqi, gənc nəslin vətənpərvər ruhda böyüməsi və eləcə də ölkəmizin xarici siyasət maraqlarına aid olan məsələlər, xüsusilə Ermənistan-Azərbaycan münaqişəsi və ümumiyyətlə, ölkəmizin həqiqətlərinin beynəlxalq auditoriyaya çatdırılması, region və onun hüdudlarından kənarda informasiya məkanının formaşdırılması, xarici mənfi ideoloji təsirlərin fonunda milli informasiya təhlükəsizliyinin təmin olunmasında müstəsna xidməti vardır. Birinci Avropa Oyunları ilə əlaqədar ölkəmizə qarşı aparılan məqsədyönlü qarayaxma kampaniyasının qarşısının alınmasında vətənpərvər milli mətbuat öz vəzifəsini bir daha layiqincə yerinə yetirdi.

Xarici İşlər Nazirliyi KİV-lə münasibətdə açıqlıq şəraitində KİV-in sorğu və suallarının operativ qaydada cavablandırılması, bu xüsusda, elektron vasitələrin tətbiqi və sosial şəbəkələrin imkanlarından geniş şəkildə istifadə edilməsi istiqamətində fəaliyyətini bundan sonra da davam etdirəcəkdir. Xarici KİV nümayəndələrinin akkreditasiyası funksiyasını həyata keçirən bir qurum kimi XİN tərəfindən bu sahədə hüquqi baza yaradılmış və elektron xidmətlərin tətbiqinə başlanmışdır.

Xarici İşlər Nazirliyi rəhbərliyi, nazirliyin mərkəzi aparatının və diplomatik nümayəndəliklərin kollektivi milli mətbuatının yaranmasının 140 illik yubileyi ilə əlaqədar bu sahədə çalışan bütün peşəkarları səmimi qəlbdən təbrik edir və bu şərəfli işlərində onlara uğurlar arzu edir.

Məqalədə:
Xəbər lenti

Xəbər lenti