Rusiyalı teleaparıcı: IV İslam Həmrəyliyi Oyunları yüksək səviyyədə təşkil edilib

Bakı. Vüqar İmanov - Trend:

Bakı-2017 IV İslam Həmrəyliyi Oyunları yüksək səviyyədə təşkil edilib.

Bunu Trend-ə karate üzrə yarışları işıqlandırmaq üçün Bakıya gəlmiş Rusiyanın “Boets” telekanalının məşhur aparıcısı Nikolay Korovin deyib.

Onun sözlərinə görə, hava limanından qarşılanmadan mehmanxanayadək hər şey ən yüksək səviyyədədir: “Möhtəşəm açılış mərasimi hər cür tərifə layiqdir. Sevindirici haldır ki, Azərbaycan Prezidenti İlham Əliyevin özü idmançıları mükafatlandırır və xoş sözlər deyir. Hər şey çox gözəldir”.

Məşhur aparıcı Rusiyanın da İslam Oyunlarında iştirakını arzulayıb: “Rusiya əhalisinin müəyyən hissəsi İslam dininə sitayiş edir. Dağıstan, Çeçenistan, Tatarıstan, Başqırdıstan və digər regionlarda çox gözəl idmançılar var. Bu cür Oyunlarda iştirak idmançılar arasında dostluq əlaqələrinin möhkəmləndirilməsinə xidmət edərdi”.

Qeyd edək ki, Bakı-2017 İslam Həmrəyliyi Oyunları mayın 22-dək davam edəcək. Yarışlar Azərbaycan paytaxtının 16 idman obyektində 21 idman növü üzrə keçirilir.