Bakı. Trend:
Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin Mərkəzi Karyera filialı tərəfindən “Tələbə İnkişaf Platforması” (TİPx) çərçivəsində növbəti “TİPx 5: Limitsizsiniz” adlı konfrans keçirilib.
Əmək və Əhalinin Sosial Müdafiəsi Nazirliyindən bu gün Trend-ə verilən məlumata görə, sayca 5-ci dəfə keçirilən konfransda müxtəlif ali təhsil müəssisələrində təhsil alan 100-dən çox tələbə, Agentliyin nümayəndələri və ekspertlər iştirak edib.
Konfransda çıxış edən Agentliyin İdarə Heyəti sədrinin müavini
Ülvi Abasquliyev hazırda həyata keçirilən layihələr və yeniliklər
barədə məlumatlar verib, əmək bazarına keçid etməyə hazırlaşan
tələbələr, məzunlar, gənclər üçün yaradılan imkanlardan bəhs
edib.
Daha sonra konfransın spikerləri “Bir dəfə Avropada”, “Azad olmaq
üçün çalışmaq”, “Rayondan kəndə”, “Şəxsi Brendinq 103-karyeranıza
təcili yardım” mövzularında təqdimatlar edib, tələbələri xaricdə
qısamüddətli təhsil və təcrübə proqramları, şəxsi inkişaf, sərbəst
iş rejimi, şəxsi brendinqin əhəmiyyəti barədə məlumatlandırıb,
peşəkar əmək fəaliyyəti üzrə təcrübə və tövsiyələrini
paylaşıblar.
Qeyd edək ki, bu günə qədər TİPx layihəsi çərçivəsində keçirilən görüşlərdə 700-ə yaxın tələbə iştirak edib. Məqsəd tələbələri təhsil fürsətləri barədə məlumatlandırmaq, özünüinkişaf və karyera planlaması istiqamətində dəstək göstərməkdir.