Bakı. Trend:
Videolar bizə deməyə əsas verir ki, təyyarəmiz xarici təsir altında qəzaya uğrayıb.
Trend xəbər verir ki, bunu bu gün Azərbaycanın rəqəmsal və inkişaf naziri Rəşad Nəbiyev Aktau yaxınlığında qəzada həlak olan 3 ekipaj üzvü (pilotlar İqor Kşnyakin, Aleksandr Kalyaninov və təyyarə bələdçisi Hökümə Əliyeva) ilə Heydər Əliyev adına Beynəlxalq Hava Limanında keçirilən vida mərasimində deyib.
"Bakı-Qroznı istiqamətində hərəkət edən yad texniki və fiziki təsir vasitəsilə qəzaya uğraması nəticəsində biz dəyərli pilotlarımızı və sərnişinlərimizi itirmişik və bu gün onları son mənzilə yola salırıq.
Artıq verilmiş şahid ifadələri və eyni zamanda, təyyarə qalıqları bizim istər sosial şəbəkədən, istərsə də xəbər agentliklərindən gördüyümüz videolar bizə deməyə tam şəkildə əsas verir ki, bizim təyyarəmiz xarici texniki və fiziki təsir altında qəzaya uğrayıb", - nazir qeyd edib.
Xatırladaq ki, bu gecə “Azərbaycan Hava Yolları” aviaşirkətinin J2-8243 nömrəli Bakı-Qroznı reysini yerinə yetirən “Embraer 190” təyyarəsinin Aktau şəhəri yaxınlığında qəzaya uğraması nəticəsində həlak olan 3 ekipaj üzvünün (pilotlar İqor Kşnyakin, Aleksandr Kalyaninov və təyyarə bələdçisi Hökümə Əliyeva) və 21 sərnişinin nəşləri Bakıya gətirilib.
Qeyd edək ki, daha öncə bu qəzada həlak olan 4 nəfərin nəşi və yaralanan 14 nəfər Bakıya gətirilib.
Xatırladaq ki, dekabrın 25-i Bakı-Qroznı marşrutu üzrə uçan "Embraer 190" sərnişin təyyarəsi Aktaunun hava limanından 3 km məsafədə qəzaya uğrayıb.
Aktau şəhərində qəzaya uğrayan Bakı-Qroznı reysini yerinə yetirən “Embraer 190” təyyarəsində 62 sərnişin, 5 ekipaj üzvü olmaqla, ümumilikdə 67 nəfər olub. Hadisə nəticəsində 38 nəfər həlak olub, 29 nəfər isə yaralanıb.
Xəbər yenilənəcək