31 mart Azərbaycanlıların soyqırımı günü ilə əlaqədar Kanadanın paytaxtı Ottavada mitinq keçiriləcək. Bu barədə Trend ə aksiyanın təşkilatçılarından olan Kanadada yaşayan azərbaycanlı Saleh İldırım məlumat verib.
Mitinq martın 31-də saat 12.00-dan 14.00-dək Ermənistan səfirliyinin, UNESKO və Kanada Parlamentinin qarşısında keçiriləcək. Aksiyaya Montreal və Toronto şəhərlərində yaşayan azərbaycanlılar, həmçinin Kanadadakı türk-Azərbaycan diaspor qurumlarının nümayəndələri qatılacaqlar. Mitinq Ermənistan səfirliyinin qarşısından başlanacaq. Aksiyada Ermənistanın Azərbaycanın torpaqlarına təcavüzü, ermənilərin törətdikləri soyqırım və terrorlara etiraz bildiriləcək. 1918-ci ilin mart ayında erməni daşnakları və silahlı quldurları tərəfindən 40 mindən çox azərbaycanlının amansızca qətlə yetirilməsi faktı pislənəcək. Həmçinin Kanada Parlamentindən və benyəlxalq təşkilatlardan bu qanlı soyqırımın tanınması tələb olunacaq.