Azərbaycanda ilk özəl teleradio şirkəti olan və 15 il fəaliyyət göstərən ANS heç bir siyasi oyunda iştirak etməyib və ümid edir ki, tezliklə onun yayımlanması bərpa olunacaq. Trend -in məlumatına görə bu haqda noyabrın 24-də keçirilən mətbuat konfransında ANS şirkətlər qrupunun prezidenti Vahid Mustafayev bildirib.
Azərbaycan Milli Tele-Radio Şurasının ANS teleradio şirkətinin yayımlanmasının dayandırılması ilə bağlı bu günkü qərarını şərh edərkən V.Mustafayev bildirib ki, Şirkətlər Qrupu Konstitusiya və ölkə qanunvericiliyi çərçivəsində yayımlanmağı bərpa etməklə bağlı bütün addımları atmaq niyyətindədir. Bununla bağlı olaraq ölkə rəhbərliyinin nümayəndələri ilə görüşlər də planlaşdırılır.
V.Mustafayev ANS təsisçilərinin tərkibinə dəyişiliklər etməyin mümkün olmadığını qeyd edib. xatırladaq ki, Azərbaycan Milli Tele-Radio Şurası bu gün səhər noyabrın 24-də saat 15:00-dan etibarən ANS telekanalının və ANS-CM-in yayımlanmasını dayandırmaq haqqında qərar qəbul edib. Qərar Şuranın ANS-in lisenziyasının uzadılması məqsədi ilə keçirilən iclasında qəbul olunub. MTRŞ-nın lisenziyanın müddətini uzatmamaq haqqında qərarı AR "Televiziya və radio yayımlama haqqında" Qanunun 22.4-cü maddəsinin tələblərinə müvafiq olaraq və qanunvericiliyin mütəmadi pozulması, Televiziya və Radio Şurası tərəfindən verilən rəsmi xəbərdarlıq və cərimə sanksiyalarına məhəl qoyulmaması və qanun pozuntuları ilə bağlı Şura tərəfindən verilən irad və xəbərdarlıqlara qeyri-səmimi münasibət nümayiş etdirilməsini nəzərə alaraq gəlmişdir.
