Quba rayonu ərazisində aşkarlanan kütləvi insan məzarlığında 120-dən artıq insan sümükləri çıxarılıb
Azərbaycan, Bakı / Trend , müxbir E.Hüseynli/ Quba rayonu ərazisində aşkarlanan kütləvi insan məzarlığında aparılan ekspertiza nəticəsində artıq 120-dən artıq insan sümükləri çıxarılıb. Bu barədə bazar ertəsi Trend ə Azərbaycan Milli Elmlər Akademiyasının (AMEA) Arxeologiya və Etnoqrafiya İnstitutunun direktor müavini Nəcəf Müseybli məlumat verib. Onun sözlərinə görə, kütləvi insan məzarlığının tam araşdırılması üçün qazma işləri davam etdirilir və artıq 400 kvadratmetr ərazi qazılıb. Müseybli bildirib ki, insan cəsədlərinin aşkarlanması tam başa çatana qədər qazma işləri aparılacaq. Müseybli bildirib ki, insan sümüklərinin sayının iki dəfədən artıq artacağı gözlənilir.
Aprelin əvvəllərində Qubada yeni şəhər stadionu tikilən zaman kütləvi insan məzarlığı aşkarlanıb. Bundan sonra ekspertiza qrupu yaradılaraq 100 kvadratmetr ərazi qazılaraq 50-yə yaxın insan sümükləri müəyyənləşdirilib. Ekspertiza qrupunun üzvləri və tarixçilər kütləvi insan məzarlığının 1918-ci ildə ermənilərin Qubada azərbaycanlılara qarşı törədilən soyqırım nəticəsində yaradıldığını müəyyənləşdirib. Öldürülənlər arasında dağ yəhudilərinin də olduğu bildirilir. Araşdırmalar başa çatdıqdan sonra həmin ərazidə soyqırım abidəsi ucaldılacaq.
