...

Azərbaycan boksçuları beynəlxalq turnirdə 7 medal qazanıblar

İdman Materials 10 Sentyabr 2012 18:26 (UTC +04:00)
Türkiyənin İstanbul şəhərində Əhməd Comərdin xatirəsinə həsr olunmuş gənclər arasında boks turnirinə yekun vurulub. 27-ci dəfə təşkil olunan yarışda 16 ölkənin 118 boksçusu qələbə uğrunda mübarizə aparıb.
Azərbaycan boksçuları beynəlxalq turnirdə 7 medal qazanıblar

Azərbaycan, Bakı, 10 sentyabr /Trend/

Türkiyənin İstanbul şəhərində Əhməd Comərdin xatirəsinə həsr olunmuş gənclər arasında boks turnirinə yekun vurulub. 27-ci dəfə təşkil olunan yarışda 16 ölkənin 118 boksçusu qələbə uğrunda mübarizə aparıb.

Azərbaycan Boks Federasiyasından bazar ertəsi Trend-ə verilən məlumata görə, gənclərdən ibarət milli komandamız qardaş ölkədə iki qızıl, iki gümüş və üç bürünc medala sahib olub.

Boksçularımızdan gənclər arasında Avropa çempionu Pərviz Bağırov (64 kq) bu dəfə də hamıdan güclü olduğunu sübut edib. Həmyerlimiz finalda Özbəkistan təmsilçisi Ənvər Turabovu 15:8 hesabı ilə məğlub edərək, fəxri kürsünün ən yüksək pilləsinə qalxıb.

Daha bir Avropa birinciliyinin qalibi - Rauf Rəhimov da (81 kq) birinci yerə layiq görülüb. Boksçumuz finalda türkiyəli Cem Kılıcı 15:8 hesabı ilə üstələyib.

52 kq çəki dərəcəsində mübarizə aparan Tural Əhmədov yalnız finalda yerli boksçu Cengiz Onata 11:13 hesabı ilə uduzaraq, 2-ci yeri tutub.

Orxan Mayıllı da (75 kq) vətənə gümüş medalla dönüb. O, finalda slovakiyalı Yozef Sirotekə 10:18 hesabı ilə məğlub olub.

Daha 3 boksçumuz - Kamran Məlikov (52 kq), Fərid İsmayılov (60 kq) və Sadiq Səmədov (91 k1) 3-cü yerə sahib olublar.

Ümumkomanda hesabında Türkiyə 1-ci, Azərbaycan 2-ci, Özbəkistan isə 3-cü yeri tutub.

Qeyd edək ki, gənclər arasında dünya birinciliyi oktyabrda Tailandda keçirilməli olsa da, AIBA təşkılatçılığı bu ölkədən alıb. Hələ ki, yarışın harada olacağı bəlli deyil.

Xəbər lenti

Xəbər lenti