Azərbaycan, Bakı/ Trend ,müxbir İ.Xəlilova/ Asiya İnkişaf Bankının Direktorlar Şurası noyabrın 2-də Bank Respublika kommersiya bankına 10 mln. dollar həcmində kredit xəttinin açılmasına razılıq verməyi planlaşdırır. Bu barədə çərşənbə axşamı AİB-in Bakı nümayəndəliyindən məlumat verilib.
Beynəlxalq maliyyə institutu və Azərbaycan bankı arasında kreditin istiqaməti ilə bağlı danışıqlar artıq başa çatıb. "Kredit tamamilə subordinasiya olunacaq və ikinci səviyyəli kapital qoyuluşu üçün nəzərdə tutulacaq",-deyə nümayəndəlikdən bildirilib.
Bu kredit portfeli nəzərə alınmaqla, Asiya bankının Bank Respublika üçün ayırdığı vəsaitlər 15 mln. dollar təşkil edəcək.
5 mln. dollar həcmində birinci kredit xətti 2007-ci ilin əvvəlində açılmışdı və bu vəsait ticari- maliyyə, kiçik və orta sahibkarlığın maliyyələşdirilməsinə istifadə olunub.
Bank Respublika bu il fəaliyyətdə olan səhmdarların vəsaitləri hesabına kapitalını artırmağı planlaşdırır. Hazırda bankın kapitalı 19 mln. manatdır ki, bunun da 25 mln. manata çatdırılması planlaşdırılır.