Azərbaycan, Bakı / Trend , müxbir İ.Xəlilova/. 2008-ci ilin dövlət büdcəsində ilk dəfə olaraq dövlət zəmanəti ilə alınan xarici borclar üçün sığorta fondunun yaradılması təklif olunmuşdur. Bu barədə çərşənbə axşamı 2008-ci ilin büdcəsinin parlament müzakirələrində Azərbaycanın maliyyə naziri Samir Şərifov demişdir.
İndiyədək bu məbləğlər dövlət büdcəsinin ayrıca hesabına daxil edilirdi və ilin başa çatması ilə silinirdi. Fondun yaradılması onun vəsaitlərindən lazımi məqsədlərlə istifadə etməyə imkan verəcək.
Nazirin sözlərinə görə, yenilik dövlət borcu haqqında bu il qüvvəyə minmiş qanunla əlaqədar tətbiq ediləcək. Həmin qanuna uyğun olaraq, dövlət zəmanəti ilə götürülmüş xarici borcların uçotu və idarəsi Maliyyə nazirliyinə həvalə edilmişdir.
Azərbaycanın borclarının oktyabrın 1-nə olan ümumi məbləği 2272,1 milyon ABŞ dollarına bərabərdir ki, bu da ölkədə ümumi əmtəə istehsalı həcminin 8,3 faizidir.