Azərbaycan, Bakı / Trend , müxbir Ü.İsmayılova/ "Az Sigorta" sığorta şirkəti ilk dəfə olaraq, hələ ki Azərbaycanın heç bir sığorta şirkəti tərəfindən təklif olunmayan tikinti işlərinin kompleks sığortasını tətbiq edir. Bu barədə çərşənbə axşamı şirkətin baş direktor müavini Xəyal Məmmədxanlı məlumat verib.
"Kompleks sığorta üçün çox vəsait tələb olunduğundan, şirkət bunları beynəlxalq təkrar sığorta şirkətlərində təkrar sığorta etmək niyyətindədir" - deyə Məmmədxanlı bildirib.
Avqust ayında Bakının mərkəzi küçələrindən birində tikilməkdə olan 16 mərtəbəli bina uçub, nəticədə, 25 nəfət həlak olub. Aparılan araşdırmalardan sonra müəyyən olunub ki, nə insanlar, nə də yaxınlıqda yerləşən binalar, sığortalanmayıb.
Binanın uçmasından sonra Trend tərəfindən sorğu aparılan sığorta şirkətlərindən bildiriblər ki, yerli sığorta şirkətləri tikinti işlərini kompleks şəkildə sığorta etmək iqtidarında deyil.
Məmmədxanlının sözlərinə görə, sığorta şirkətinin sığorta işlərinin kompleks şəkildə sığortası ilə bağlı bütün hazırlıq işləri başa çatdırılsa da, hələ ki, cəmi bir neçə sığorta şirkəti sığorta məqsədilə şirkətə müraciət edib.
"Hesab edirəm ki, ölkənin tikinti sahəsində hazırda canlanma getdiyini nəzərə alsaq, tikinti işləri mütləq sığortalanmalıdır" -deyə Məmmədxanlı bildirib.
Azərbaycanda 29 sığorta şirkəti fəaliyyət göstərir və minimal Nizamnamə kapitalı 700 min manat təşkil edir.
