Azərbaycan, Bakı/ Trend Ü.İsmayılova/ Yeni sığorta şirkəti "Qarant Sigorta" Azərbaycan Maliyyə Nazirliyindən 18 növ könüllü və 4 növ icbari sığorta xidməti göstərmək üçün lisenziya alıb. Bu barədə cümə axşamı Azərbaycan Maliyyə Nazirliyinin Dövlət Sığorta Nəzarəti şöbəsinin müdiri Namiq Xəlilov xəbər verib. Şirkət artıq Azərbaycan Ədliyyə Nazirliyində qeydiyyatdan keçib. "Qarant Sigorta" "ZQAN Holdings"in tərkibinə daxildir. Xəlilovun sözlərinə görə, şirkətin nizamnamə kapitalı, ölkə parlamentində müzakirə edilən sığorta haqqında qanun layihəsinə əsasən, 1 mln. manat səviyyəsində müəyyənləşdirilib. Azərbaycanda hazırkı dövrdə ("Qarant Sigorta" ilə birlikdə) 28 sığorta şirkəti fəaliyyt göstərir. Sentyabrda Maliyyə Nazirliyi "Qorgud Sigorta" və "Star Alliance" sığorta şirkətlərində pozuntular (şirkətin kapitalı nizamnamə kapitalından az olmamalıdır) üzə çıxarıb və onların lisenziyalarını geri çağırıb. "ZQAN Holdings" 2000-ci ildə təsis olunub və öz fəaliyyətini ZQAN şirkətlər qrupunda idarəedici kimi reallaşdırır. Fəaliyyətinin əsas növlərini tikinti materiallarının istesalı, bank xidmətləri, telekommunikasiyalar, sağlamlaşdırıcı və idman kompleksləri, mehmanxana biznesi, tikinti, sərnişin və yük daşımaları, qapı, pəncərə isteshalı və s. təşkil edir.
...
