Azərbaycan, Bakı/ Trend , müxbir İ.Xəlilova/ Azərbaycanın aparıcı banklarından olan AzerigazBank -ın səhmdarları bankın səhmlərinin 10 faizinin xarici investora satılmasını təsdiqləyiblər. Bu barədə çərşənbə günü bankdan məlumat veriblər. Yeni səhmdarın banka daxil olması səhmlərin emissiyası yolu ilə baş tutacaq. Səhmlərin satılmasına dair qərar bankın dekabrın 3-də keçirilən iclasında qəbul edilib. İndiyədək bankın yeganə xarici səhmdarı AzerigazBank - ın səhmlərinin 17.5 faizini (735000 səhm) alan Beynəlxalq Maliyyə Korporasiyası (İFC) olub. AzerigazBank səhmdarlarının qərarına əsasən, bankın Nizamnamə kapitalı 3 mln. manatdan 15 mln. manata çadırılacaq. Yeni səhmlərin emissiyasından əlavə, bank, bankın imtiyazlı səhmlərinin statusunun sadə səhmlərlə əvəz edilməsi üçün Qiymətli Kağızlarla iş üzrə Dövlət Komitəsinə müraciət etmək niyyətindədir. Bank tərəfindən, dəyəri 2 manat olmaqla, 300 min imtiyazlı səhm buraxılıb. Bundan sonra AzerigazBank səs hüququna malik səhmlərə malik olacaq. AzerigazBank - ın idarə heyətinin sədri Azər Mövsümovun sözlərinə görə, səhmlərə dividendlərin 17-20 faiz səviyyəsində olması gözlənilir. Bankın balans kapitalı 19.5 mln. manata çatıb. Məcmu kapital 30.2 faiz artaraq, 16.76 mln. manatı keçib. Ödənilmiş Nizamnamə Fondu 15.6 faiz artıb, 10.35 mln. manat təşkil edib. Səhmdarların iclası 2007 - ci ilin mayında AYİB -dən AzerigazBank-a 6 mln. dollar kredit xəttinin açılmasına dair müqaviləni təsdiq edib. Səhmdarlara bankın inkişafını əks etdirən maliyyə göstəriciləri təqdim edilib. Bankın aktivləri 9 ay ərzində 52.7 faiz artaraq, 135.28 mln. manata çatıb. Fiziki və hüquqi şəxslərə verilən kreditlər, 68.8 faiz artımla, 90.53 mln. manat təşkil edib. AzerigazBank -ın məcmu öhdəlikləri 73.82 mln. manat artaraq, 116.13 mln. manat təşkil edib. Depozit portfeli 57.3 faiz genişlənərək, 89.54 mln. manat təşkil edib, o cümlədən, təcili depozitlər 84.3 faiz artmaqla, 59.67 mln. manata bərabər olub. Bankın gəlirləri, ötən ilin müvafiq dövrü ilə müqayisədə, 61.5 faiz və 70.1 faiz artaraq 14.66 mln. manat, xərcləri isə 11.46 mln.manat olub. Xalis mənfəət 38.9 faiz artaraq, 2.48 mln. manat təşkil edib.
...