Azərbaycan, Bakı / Trend , müxbir İ.Xəlilova / 2008-ci il yanvarın 1-dən Azərbaycanın Vergilər Nazirliyində tətbiq olunacaq "bir pəncərə" prinsipi üzrə sahibkarlıq subyektlərinin dövlət qeydiyyatının təşkil edilməsi üçün ölkə prezidenti İlham Əliyev 4 mln. manatın ayrılmasına dair sərəncam verib. Bu vəsait Nazirliyə dövlət başçısının ehtiyat fondundan ayrılacaq.
Vəsait "bir pəncərə" prinsipinin tətbiq edilməsi ilə əlaqədar proqram təminatı üçün lisenziyanın alınması, lazımi avadanlığın əldə edilməsi və quraşdırılması üçün nəzərdə tutulub.
Bu prinsipin tətbiq edilməsində əsas məqsəd ölkədə biznesin qeydiyyatı sisteminin sadələşdirilməsidir. Sistemin tətbiqi nəticəsində yeni müəssisələrin dövlət qeydiyyatı müddəti 20 gündən 3-4 günə qədər azaldılacaq.
Möhürün alınması, sənədlərin notariusda təminatı, bank hesabının açılması nəzərə alınmaqla, qeydiyyata hazırkı 30 gündən fərqli olaraq, 10 gün sərf olunacaq. Prosedur sayı 13-dən 5-ə enəcək.
Gələcəkdə elektron imzanın tətbiq edilməsilə biznesin dövlət qeydiyyatı on-line rejimi vasiətsilə mümkün olacaq.
Azərbaycanda biznesin sadələşdirilməsi üzrə tədbirlər məhz bu prosedur vasitəsilə DB və Doing Business BMK-nın hesabatı üzrə ilk iyirmiliyə düşmək imkanı verəcək. 2007-ci ildə bu mövqe üzrə ölkə 64-cü yeri tutub, ümumilikdə isə, biznesin aparılması üçün şərtlərin bəsitliyi dərəcəsi üzrə isə,178 ölkə arasında 96-cı olub. Bu işdə ölkəyə biznes mühitinin inkişafı layihəsi çərçivəsində, Beynəlxalq Maliyyə Korparasiyası yardım edir.
