Azərbaycan, Bakı, 17 mart/ Trend , müxbir S.Babayeva/ Quraq rayonlarda kənd təsərrüfatı tədqiqatları beynəlxalq mərkəzinin - İCARDA-nın Mərkəzi Asiya və Cənubi Qafqaz üzrə yeni koordinatoru Kristofer Martius martda Bakıya gələcək. O, bu vəzifənin icrasına yanvarda başlayıb.
Azərbaycan Kənd Təsərrüfatı Nazirliyinin elmi-aqrar mərkəzindən bazar ertəsi verilən məlumata görə, ikigünlük səfər martın 30-na nəzərdə tutulur.
"Koordinatorun səfərinin əsas məqsədi əməkdaşlıq perspektivlərini müzakirə etməkdir" - mərkəzdən bildiriblər.
Martius Kənd Təsərrüfatı Nazirliyinin müxtəlif bölmələri ilə görüşlər keçirəcək, birgə layihələri reallaşdırma imkanlarını müzakirə edəcək.
1977-ci ildə təsis edilən İCARDA bütün dünya üzrə yerləşmiş və Beynəxalq Kənd Təsərrüfatı tədqiqatları üzrə Məsləhətçi Qrup (Consultative Group on International Agricultural Research (CGIAR)) tərəfindən dəstəklənən 15 mərkəzdən biridir. Baş ofisi Aleppoda (Suriya) yerləşən təşkilat əməkdaşlıq şəbəkəsi vasitəsilə milli, regional və beynəlxalq institutlar, universitetlər, QHT, inkişaf olan ölkələrdəki nazirliklər və sənaye ölkələrindəki müvəffəqiyyətlə fəaliyyət göstərən tədqiqat institutları ilə işləyir.
Azərbaycan Kənd Təsərrüfatı Nazirliyinin elmi-aqrar mərkəzi İCARDA ilə 90-cı illərin sonunda imzalanmış əməkdaşlıq haqqında sənədə malikdir. İCARDA-nın maliyyə yardımı ilə Azərbaycanda aşağıdakı layihələr maliyyələşdirilib: "Tərtər rayonunda təcrübə sahəsində soyakimilərin intensiv əkilməsi üçün fermer təsərrüfatlarının iştirakı ilə təkmilləşdirilmiş suvarma sistemlərinin yoxlanılması", "Fermerlərin cəlb edilməsi ilə Şamaxı rayonunda dağ ətəklərində meyvə bağlarının becərilməsi texnologiyalarının tədqiqatı" və s.
Bundan əlavə, Azərbaycan mütəxəssisləri şirkətin vəsaitləri hesabına dövri olaraq, xaricdə müxtəlif treninqlərdə iştirak edirlər.
