Azərbaycan, Bakı, 18 mart/ Trend , müxbir İ.Xəlilova/Azərbaycan hökuməti Ümumdünya Ticarət Təşkilatı katibiliyindən İşçi Qrupu ilə danışıqların beşinci raundunun keçirilməsinin tarixini təyin edilməsini gözləyir. Bu barədə iqtisadi inkişaf nazirinin müavini Mikayıl Cabbarov məlumat verib. Onun rəyinə görə, ÜTT ölkələri ilə Cenevrədə çoxtərəfli və ikitərəfli danışıqların keçirilməsi tarixi üst-üstə düşəcək. Danışılqarın aprel-mayda keçiriləcəyi güman edilir.
"Adətən, hökumət nümayəndə heyətinin ÜTT İşçi Qrupu ilə görüşü zamanı çoxtərəfli və ikitərəfli danışıqlar üçün kifayət qədər çox vaxt olur", - nazir müavini dəqiqləşdirib.
İki ölkə ilə ikitərəfli danışıqların başa çatmasından sonra protokol imzalanması ehtimalı istisna edilmir. Azərbaycan bu günəTürkiyə, Gürcüstan, Əmman, Moldova və BƏƏ ilə danışıqları başa çatdırıb. Lakin danışıqların yekunu üzrə protokol yalnız Türkiyə ilə imzalanıb. Cabbarovun sözlərinə görə, Əmman və BƏƏ ikitərəfli sənədin imzalanmasına hazır olduqlarını bildiriblər. Cabbarov bildirib ki, hazırda protokolların imzalanması ilə bağlı səlahiyyətlərin alınması üçün müvafiq sənədlər Prezident Apparatına təqdim edilib.
Ölkə ABŞ, Avropa İttifaqı, Cənubi Koreya, Yaponiya, Çinin Tayvan əyaləti ilə danışıqlar mərhələsindədir və bu il Hindistan və Norveç bu ölkələr sırasına daxil olub.
Danışıqlar qrupunun rəhbəri, AR xarici işlər nazirinin müavini Mahmud Məmmədquliyevin əvvəllər bildirdiyinə görə, ÜTT İşçi Qrupu ilə danışıqların növbəti mərhələsinin keçirilməsində ləngimələr olduğu halda, hökumət bu ölkələrin paytaxlarında və ya Azərbaycanda ikitərəfli danışıqların tarixini razılaşdırmaq niyyətindədir.
İndiyədək belə etmək mümkün deyildi. Belə ki, danışıqların davam etməsi üçün baund-tariflərin, yəni Azərbaycanın mal və xidmətlər bazarına daxil olmaq üçün gömrük tariflərinin maksimal ölçüsü qanunvericiliyin ÜTT tələblərinə uyğun vəziyyətə gətirilməsi, ölkənin bank, sığorta, telekommunikasiya, enerji bazarına çıxış üzrə təkliflərin yenilənmiş variantını təqdim etmək lazımdır. Bu təkliflər artıq Ümumdünya Ticarət Təşkilatının Katibliyinə təqdim edilib.
Azərbaycan 1997-ci ildən ÜTT-də müşahidəçi statusuna malikdir.
Məqalə müəllifinin ünvanı: [email protected]
