Azərbaycan, Bakı, 19 may/ Trend , müxbir İ.Xəlilova/ Yanvar-apreldə Azərbaycanda sənaye istehsalı həcmi [məhsul istehsal edilib və sənaye xarakterli xidmətlər göstərilib] 7 051,9 mln. manat təşkil edib ki, bu da ötən ilin analoji göstəricilərini 14,3 faiz ötür. Bu barədə bazar ertəsi Dövlət Statistika Komitəsindən məlumat veriblər. Sənayenin qeyri-neft sektorunda sənaye məhsulu istehsalı və göstərilən xidmətlərin həcmi 16,2 faiz, neft sektorunda isə 13,7 faiz artıb.
Hesabat dövründə mədən sənayesində artım tepmləri 14,7 faiz səviyyəsində olub və ümumi sənaye istehsalında xüsusi çəkisi 78,8 faiz olmaqla 7 581,5 mln. manat təşkil edib. Lakin emaledici sənayenin artım templəri 14,1 faiz olub və 1 582,4 mln. manat (16,4 faiz) təşkil edib. Elektrik enerjisi, qaz və su sektoruna isə 2,6 faiz artımla 463,01 mln. manat düşür.
Neft hasilatında artım 14,1 faiz, qaz hasilatı - 79,8 faiz, neft emalında isə 4,4 faiz olub.
Hesabat dövründə metallurgiya sənayesində və metaldan olan hazır məhsullarda 43,3 faiz, ağac məmulatları və oduncağın emalı - 4,8 faiz, ərzaq məhsulları - 12,9 faiz, kimya məhsulları - 2,1 dəfə artım müşahdiə olunur.
Yanvar-apreldə ümumi sənaye istehsalında qeyri-dövlət sektorunun payı 80,3 faiz (7 732,8 mln. manat) olub. Qeyri-dövlət sektorunda artım 16,6 faiz, dövlət sənayesində isə, 5,8 faiz səviyyəsində olub.
Müəlliflə əlaqə saxlamaq üçün elektron ünvan: [email protected]
