Azərbaycan, Bakı, 30 may/ Trend , müxbir İ.Xəlilova/ İslam İnkişaf Bankı (İİB) hələ ki, Azərbaycanda nümayəndəliyin açılması məsələsini nəzərdən keçirmir. Bu, ölkədə aparılan əməliyyatların həcmindən asılı olacaq. Bu barədə cümə günü Bakıda İİB-in regional nümayəndəliyinin direktoru Nik Zeynal Abidin məlumat verib.
"Azərbaycanda artıq nümayəndəlik ofisi fəaliyyət göstərir. Lakin onun statusunun artırılması ölkə hökuməti ilə aparılan danışıqların nəticələrindən asılıdır", - regional direktor hesab edir.
İİB-in Azərbaycanda əməliyyatlarının həcmi $300 mln. qiymətləndirilir. Bu vəsait aqrar sektorun maliyyələşdirilməsi, irriqasiya-drenaj sisteminin, yol-nəqliyyat infrastrukturunun, orta və kiçik biznesin inkişafı, məcburi köçkünlərin infrastrukturunun yaxşılaşdırılmasına yönəlib.
Hazırda Bakı-Gürcüstan sərhədi avtomobil magistralının yenidən qurulması layihəsi reallaşdırılır və bank bunun üçün $45 mln. ayırıb. Yaxın vaxtlarda Ucar-Yevlax və Yevlax-Gəncə yolunun tikinsi üzrə tikinti işləri başlayacaq və bunun üçün $30 mln. ayrılıb. İşlər il ərzində başa çatacaq. İİB bir ildən sonra daha bir yol layihəsinin reallaşdırılmasına başlamaq niyyətindədir. Bu layihə üzrə hazırda Azərbaycan hökuməti ilə danışıqlar aparılır.
Bundan əlavə, elektrik ötürücü xətlərinin tikintisi layihəsinin maliyyələşdirilməsi imkanı müzakirə edilir.
"Biz ümid edirik ki, il ərzində onun reallaşdırılmasına başlamaq mümkün olacaq. Hazırda elektrik enerjisinin veriləcəyi generatorların yerləşəcəyi yerlər müzakirə olunur", - Abidin bildirib.
Bu layihənin reallaşdırılması üçün $45-50 mln. ayrıla bilər. Enerji layihələri səmərəli olduğundan, bank onları kommersiya şərtləri əsasında maliyyələşdirir. Xaçmaz yarımstansiyası, Mingəçevir elektrik stansiyasının tikintisi layihələri reallaşdırılır.
Mayın 30-a olan rəsmi məzənnə - 0,8248 AZN/USD.
Müəlliflə əlaqə saxlamaq üçün elektron ünvan: [email protected]
