Türkiyə, İstanbul, 03 iyun / Trend / Cari ilin may ayı ərzində Türkiyənin ixracatı 12 milyard 281 milyon dollar təşkil edərək, aylıq ixracat səviyyəsinə görə bu ölkənin tarixində rekord göstəriciyə çatıb. Bu, Türkiyənin 1989-cu ildəki illik ixracatından (11,6 dəfə) çoxdur. May ayının göstəriciləri ilə birlikdə Türkiyənin son 12 aylıq ixracatı 28.42 faiz artaraq, 120 milyard dolları keçib.
Türkiyənin İxracatçılar Məclisinin sədri Oğuz Satıcı son statistik məlumatları açıqlayaraq, may ayında ixracatın keçən ilin eyni dövrü ilə müqayisədə 34.48 faiz artdığını bildirib. Onun sözlərinə görə, göstərici 2008-ci ilin ilk 5 ayı üzrə 36.36 faiz artaraq 55 milyard 73 milyona çatıb.
May ayında ən yüksək ixracatın qeydə alındığı sektor nəqliyyat və sənaye sektoru olub. Bu sektorda ixracat 2 milyard 536 milyon dollar təşkil edib. Dəmir və polad sektorunda 1.965 milyard, kimyəvi maddələr sektorunda isə 1.507 milyard dollarlıq ixracat qeydə alınıb.
Kənd təsərrüfatı və heyvandarlıq may ayının ümumi ixracatının cəmi 8.46 faizini təşkil edib. Bu sahədə keçən il ilə müqayisədə 32.52 faiz artım var.
İxracatda ən yüksək artım sənaye sektorunda müşahidə edilir. May ayında bu göstərici 34.62 faiz artaraq, 10 milyard 936 mln. dollara çatıb ki, bu da ümumi ixracatın 89.05 faizini təşkil edib.
May ayında Türkiyənin ixracatında ilk 20 ölkə arasında Almaniya, İtaliya, Birləşmiş Ərəb Əmirlikləri, İngiltərə, Rusiya, Fransa, İspaniya, Rumıniya, ABŞ, Hollandiya, İraq, İran, Yunanıstan, Bolqarıstan, Belçika, Ukrayna, Səudiyyə Ərəbistanı, İsrail, Azərbaycan və Çin Xalq Respublikası yer alıb. İlk 20 ölkə ümumi ixracatın 68,53 faizini təşkil edib. Türkiyənin may ayında 1 milyard dollardan artıq ixracat gerçəkləşdirdiyi yeganə ölkə əvvəllər də olduğu kimi Almaniya olub.
Əldə edilən nəticələr Türkiyənin hökumət nümayəndələrinin gələcəyə dair nikbin bəyanatlarına əsas verib. İqtisadiyyat üzrə dövlət naziri Gürşat Tüzmən bildirib ki, xarici ticarət indiki kimi uğurla davam edərsə, Türkiyə ixracatda hədəf kimi müəyyən edilən illik 125 mlrd. dollarlıq səviyyəni keçəcək. Nazirin fikrincə, 200 milyard dollara yaxın idxalat da nəzərə alınarsa, Türkiyə 325 mlrd. dollarlıq nəhəng xarici ticarət həcminə malik olan bir ölkəyə çevrilməkdədir.
Eyni zamanda, müşahidəçilər və mütəxəssislər Türkiyənin daxili siyasi məsələlərinin iqtisadiyyatın inkişafı üçün maneə təşkil edə biləcəyindən narahatlıqlarını ifadə edirlər. Bu baxımdan, hakim Ədalət və İnkişaf Partiyasının bağlanması ilə bağlı Konstitusiya Məhkəməsində davam edən prosesin nəticəsi həyəcanla gözlənilir. Türkiyə İxracatçılar Məclisinin sədri Oğuz Satıcı bildirib ki, Türkiyə son bir ərzində gündəliyi "işğal" edən siyasi problemlərdən azad olub.
"Hazırkı gündəm, yəni iqtisadiyyat cəmiyyəti narahat edən məsələlərə və Avropa Birliyi ilə inteqrasiya məsələlərinə yönəlməlidir", - deyə o bildirib
