Azərbaycan, Bakı, 18 iyun / T , müxbir U.İsmayılova/ Turist qismində xaricə gedən azərbaycanlıların sığorta polislərinin satış bazarı cari ildə 30 faiz artacaq. Bu barədə Azərbaycanın iri sığorta şirkətlərindən biri olan "MBASK"ın ekspertləri hesab edirlər.
"Turistlər artıq bu xidmətə əvvəllər olduğu kimi şübhə ilə yanaşmırlar, bununla əlaqədar sığorta üzrə ödəmələr kifayət qədər tez-tez baş verir", - deyə ekspertlər bildiriblər.
"MBASK" 2007-ci ildə xaricdə zərər çəkən turistlərə 67 min manatdan çox pul ödəyib.
"MBASK"ın tibbi sığorta üzrə mütəxəssisləri müəyyən ediblər ki, yayda turistlər qış aylarındakından fərqli olaraq 2,5 dəfə çox xoşagəlməz vəziyyətlərlə üzləşirlər.
"MBASK"ın xüsusi sığorta şöbəsinin müdiri Sabir Quliyev hesab edir ki, xaricə gedənlərin sığortaya marağının artmasında ötən illərdə turistlərin başına gələn fövqəladə hadisələr əsas rol oynayıb. Nəticə etibarı ilə, hətta əgər turizm firması sığorta polisi təklif etmirsə, insanlar yenə də müstəqil olaraq sığortaçıya müraciət edirlər.
Quliyev bildirib ki, əgər əvvəllər müştərilər səfirlikdə viza rəsmiləşdirilən zaman tələb olunan minimal sığorta paketini alırdılarsa, indi hamı xidmətlər paketinin genişləndirilməsini təkid edir.
"Əgər əvvəllər bu kimi sığortanın nəyə lazım olduğunu soruşurdularsa, indi onlar sığorta hüquqlarını, sığorta məbləğini dəqiqləşdirirlər, hətta bəzən onun artırılmasını xahiş edirlər", - deyə Quliyev bildirib.
1992-ci ildən Azərbaycanın sığorta bazarında fəaliyyət göstərən "MBASK" sığortanın 29 növü üzrə xidmət təklif edir. Bu xidmətlərdən dördü icbaridir. Şirkətin nizamnamə kapitalı 2 mln. manat təşkil edir. "MBASK"ın səhm faizlərinin üçdə biri 2005-ci ilin yanvarından AYİB-ə məxsusdur.
Məqalə müəllifi ilə əlaqə ünvanı: capital