Azərbaycan, Bakı, 25 iyun / Trend , müxbir U.İsmayılova/ Beynəlxalq Maliyyə Korporasiyasının (BMK) korporativ idarəetmə layihəsinin II fazası Azərbaycanda korporativ İdarəetmə Məcəlləsinin hazırlanmasına yardım göstərəcək. Bu barədə layihə direktoru Kerolayn Brayt bildirib.
"Korporativ İdarəetmə Məcəlləsi ölkənin bütün şirkət və müəssisələrində korporativ idarəetmənin tətbiqinə yardım göstərəcək", - deyə Brayt bildirib.
"Azərbaycanın İqtisadi İnkişaf Nazirliyi hazırda korporativ İdarəetmə Məcəlləsini hazırlayır və payızda ilkin layihə hökumətə təqdim ediləcək", - deyə nazirliyin idarə heyətinin rəhbəri Sənan Tapdıqov bildirib.
Tapdıqovun sözlərinə görə, Məcəllə şirkətlərlə müntəzəm ünsiyyət ilə hazırlanır. Tapdıqovun sözlərinə görə, Məcəllənin hazırlanması və təsdiqindən sonra korporativ idarəetmə konsepsiyasının hazırlanması, həmçinin hazırkı qanunların korporativ idarəetmə qaydaları əsasında təkmilləşdirilməsi planlaşdırılır.
Çərşənbə axşamı Beynəlxalq Maliyyə Korporasiyası (IFC) İsveçrənin İqtisadi Əlaqələr üzrə Dövlət Katibliyi - SECO -nun maliyyə dəstəyi ilə reallaşdırılan Azərbaycanda korporativ idarəetmə layihəsinin II fazasını təqdim edib. SECO üç illik layihəyə 2,9 mln. dollar məbləğində vəsait ayırıb.
BMK layihənin II fazası çərçivəsində özəl banklar, sığorta şirkətləri və mikromaliyyələşmənin digər maliyyə institutları ilə işləmək niyyətindədir. Azərbaycanda korporativ idarəetmə layihəsinin II fazasının dəyəri 4 mln. dollardan çox təşkil edir.
Məqalə müəllifi ilə əlaqə ünvanı: capital
