Azərbaycan, Gəncə, 17 iyul/ Trend , müxbir S.Fətəliyev/"Şəki su kanalı" ASC Şəki ve Gəncə şəhərlərinin su və kanalizasiya sisteminin yenidən bərpası üçün layihə - smeta sənədlərinin yenidən işlənməsinin zəruri olduğunu bəyan edir.
"Şəki ve Gəncə şəhərlərinin su və kanalizasiya sistemlərinin yenidən qurulması üçün 2000 - ci ildə layihə - smeta sənədləri hazırlanıb. Bu gün bu sənədlər reallağı əks etdirmir", - Trend -ın region müxbirinə "Şəki su kanalı" ASC-nin rəisi Bayram Məmmədov deyib.
Məsələn, ilkin sənədlərdə yağış sularının kanalizasiya sisteminə axıdılması nəzərdə tutulmayıb."Yeni sənəddə bu öz əksini tapacaq", - Məmmədov bildirib.
Sənədlərin yeniləşməsi məsələsi çərşənbə günü Gəncədə alman inkişaf bankı KfW-in iştirakı ilə keçirilən seminarda müzakirə edilib.Seminarda mütəxəssislər Şeki şəhərinin su ilə təmin olunmasını və onun Azərbaycanın şimal-qərb regionundakı çaylardan suyun alınması məsələlərini müzakirə ediblər. Alman mütəxəssisləri təklif ediblər ki, su çaydan birbaşa hovuzlara vurulsun; bu gün də bu sistemdən istifadə edilir. Azərbaycanlı mütəxəssislər hesab edirlər ki, bu sistem özünü doğrultmur; çaya sel gələndə əhali günlərlə susuz qalır. Əvəzində, Azərbaycan mütəxəssisləri daha etibarlı drenajor sistemini təklif edir. Belə ki, 11 metr dərinlikdə 1 km uzunluqda boruları çayın mənbəyinə basdırmaqla suyu götürmək daha təhlükəsizdir və əhalini daim su ilə təmin etmək mümkündür.
"Bu müzakirələri başa çatdırmaq üçün cümə günü Bakıda yenidən görüşlər olacaq. Layihəyə nə qədər vəsait ayrılacağı hələlik məlum deyil, belə ki, layihə - smeta sənədləri tam hazır olmadığı üçün bu haqda danışmağa dəyməz", - Məmmədov deyib.
Layihənin ümumi dəyəri 54,6 mln. avrodur. Bunun 37 mln. avrosunu bank kredit şəklində verir, 10 mln. avronu SECO qrant kimi verəcək, qalan məbləğ isə, Azərbaycan hökumətinin payına düşür.
Layihənin həyata keçirilməsinə bu il başlanacaq. Layihənin üç ildən sonra başa çatdırılması planlaşdırılır.
Bu regionların içməli su ilə təminatı üzrə həyata keçiriləçək işlər nəticəsində, 2020 - ci ilədək illik hesablamada adambaşına dəqiqədə 790 litr, 2025 - ci ilədək isə, 975 litr su düşəcək.
