Azərbaycan, Bakı, 07 avqust/ Trend , müxbir İ.Xəlilova/ Azərbaycan Milli Bankı (AMB) Azərbaycan Mikromaliyyələşdirmə Bankının (AMMB) adının AccessBank-a dəyişdirilməsinə icazə verib. Bu barədə cümə axşamı Bankın baş meneceri Endrü Pospilovski məlumat verib.
"Bankın adının dəyişdirilməsi hazırki adın bankın bütün fəaliyyət sahələrini əks etdirməməsi və əsas vurğunun mikromaliyyələşdirmənin üzərində dayanması ilə əlaqədardır, - Pospilovski qeyd edib. Yeni ad daha unikaldır və bank fəaliyyətinin tam spektrinin əks etdirir".
Onun sözlərinə görə, bankın fəaliyyət sahələrinə həm mikro, həm də kiçik və orta biznesin inkişafının dəstəklənməsi, hesablara xidmət göstərilməsi və s. daxildir. Lakin bank hələ ki ipoteka kreditləşməsi istiqamətində işləməyə hazırlaşmır.
Bankın adının dəyişdirilməsi AMMB-nin səhmdar strukturuna təsir etməyəcək. Onlar mövcud paylara müvafiq olaraq, bank kapitalında iştiraklarını saxlayacaqlar.
Bankın menecerinin sözlərinə görə, səhmdarlar artıq 20 mln. manat səviyyəsində elan edilmiş Nizamnamə kapitalının ödənilməsini başa çatdırıblar. Bank səhmdarlarının strukturu aşağıdakı kimidir: Avropa Yenidənqurma və İnkişaf Bankı - 20 faiz, Beynəlxalq Maliyyə Korporasiyası - 20 faiz, Qara dəniz Ticarət və İnkişaf Bankı - 20 faiz, KfW Development Bank - 20 faiz, AccessHolding - 16,53 faiz, və Almaniyanın LFS Financial Systems GmbH şirkəti - 3,47 faiz paya malikdir.
Kapitallaşma nəticəsində bankın məcmu kapitalı 38 mln. manatadək çatdırılıb.
"AMMB-nin kapitallaşma səviyyəsinin AMB-nin məcmu kapitala qarşı normativ tələbinə nisbətdə 4, kapitalın adekvatlılığına nisbətdə 2 dəfə artması, böyük artıma imkanlar yaradır", - Pospilovski bildirib.
[AMB-nin məcmu kapitala normativ tələbi 10 mln. manat səviyyəsində, kapitalın adekvatlılığı norması isə (kapitalın aktivlərə nisbət) - 12 faiz müəyyən edilib]. Hazırda AMMB-nin kapitalının adekvatlılıq norması 25 faizə çatır.
İyulun sonuna bankın aktivləri $210 mln.-u ötüb.
Avqustun 7-nə olan cari məzənnə -- 0,8097 AZN/USD.
Müəlliflə əlaqə saxlamaq üçün elektron ünvan - [email protected]