Azərbaycan, Bakı, 11 avqust/ Trend Cap , müxbir İ.Xəlilova/ İqtisadi Tədqiqatlar Mərkəzinin hesablamalarına görə, iyul ərzində Azərbaycanda istehlak qiymətləri indeksi 0,72 faiz, Bakıda 0,44 faiz, regionlarda isə 1,09 faiz olub, bazar ertəsi Mərkəzdən bildiriblər. Tədqiqatlar Açıq Cəmiyət İnstututu Budapeşt Fondunun İnstitusional yardım layihəsi çərçivəsində həyata keçirdiyi "Alternativ inflyasiya səviyyəsinin hesablanması" Proqramı üzrə aparılır.
Hesablamalar Azərbaycanın 11 regionunda qiymətlərin monitorinqi əsasında aparılıb.
Ən yüksək inflyasiya səviyyəsi ərzaq məhsullarında - 0,91 faiz müşahidə olunub. Hesabat dövrü ərzində inflyasiya səviyyəsi qeyri - ərzaq məhsulları üzrə - 0,67 faiz, xidmət üzrə isə 0,29 faiz təşkil edib.
Mərkəzin hesablamalarına görə, bu ilin 7 ayında Azərbaycanda istehlak qiymətləri indeksi 15,58 faiz, bu ilin iyul ayının ötən müvafiq dövrü ilə müqayisəsində, illik inflyasiya isə 29,1 faiz qeydə alınıb.
Aparılmış statistik müşahidə nəticəsində məlum olub ki, bu ilin iyul ayında ən çox bahalaşma ərzaq məhsulları üzrə - göyərti - 66,55 faiz, qovun - 56,07 faiz, şəkər - 21,77 faiz, çiyələk - 14,74 faiz, yerli xiyar - 14,12 faiz.
Qeyri -ərzaq məhsulları üzrə bahalaşma - mebel - 13,25 faiz, soyuducular -11,99 faiz, velosipedlər - 2,53 faiz, xidmət sahəsində: restoran xidmətləri - 14,94 faiz, otel və mehmanxanalar xidməti - 11,09 faiz olub.
Ən çox ucuzlaşma isə, ərzaq məhsulları üzrə - yerli pomidor - 14,75 faiz, lumu -11,28 faiz, təzə kartof - 11,03 faiz, şaftalı - 6,94 faiz, buğda unu - 4,12 faiz olub.
Avqustun 11-nə olan cari məzənnə -- 0,8129 AZN/USD.
Müəlliflə əlaqə saxlamaq üçün elektron ünvan - [email protected]
