Azərbaycan, Bakı, 15 avqust / Trend , müxbir E.İsmayılov/ "Cappy" natural şirələrin istehsalına başlamaq üçün "Coca-Cola" şirkəti sərmayələrinin həcmi təqribən 4 mln. avro təşkil edir. Bu barədə "Azerbaijan Coca-Cola bottlers Ltd"nin baş meneceri Oğuz Əldemir bildirib.
"Təkcə məhsulun paketlənməsinə təqribən 2,5 mln. avro sərf olunub, xərclərin ümumi həcmi isə təxminən 4 mln. avro təşkil edir", - deyə Əldəmir bildirib.
Yeni məhsulun istehsal gücü saatda 12 min litr qablaşdırma təşkil edir. "Lakin istehsal həcmi, əlbəttə ki, tələbatdan asılı olacaq", - deyə baş menecer bildirib.
Hələ ki, istehsala yeni natural şirənin dörd növü buraxılıb. Bu növlərin istehsalı üçün konsentrat xaricdən gətiriləcək, xüsusilə də Braziliya (Portağal), Yunanıstan (Ərik), Türkiyə (Albalı) və Fransadan (Multivitamin).
Əldemirin bildirdiyinə görə, istehsal üçün xammal idxalının səbəbi bu konsentratların "Coca-Cola" standartlarına cavab verməsidir. Azərbaycanda alma, nar kimi yerli xammallardan istifadə olunması da planlaşdırılır. "Hazırda müxəxəssislərimiz standartlara müvafiq alma və nardan alınan şirələr üzərində işləyirlər", - deyə Əldemir söyləyib.
İstehsal olunan məhsul ilk növbədə Gürcüstan da daxil olmaqla, ğir neçə ölkəyə ixrac üçün nəzərdə tutulub. "Biz Qafqaz bazarına məhz Azərbaycandan çıxırıq", - deyə Əldemir bildirib.
"Coca-Cola" şirkəti 1994-cü ildən Azərbaycanda fəaliyyət göstərir. Ötən aya olan məlumatlara görə, sərinləşdirici qazlı içkilər bazarında onun payı 56 faiz, su istehsalı üzrə isə 50,1 faiz təşkil edir. Əldemir bildirib ki, 1996-cı ildən bu günədək şirkət tərəfindən 83 mln. dollar həcmində vergi ödənib.
Məqalə müəllifi ilə əlaqə ünvanı: capital
