Azərbaycan, Bakı, 20 avqust/ Trend , müxbir Ü.İsmayılova/ Azərbaycanlı sahibkarlar öz mallarını güzəştli şərtlər əsasında ixrac etmək üçün Ümumiləşdirilmiş Preferensiyalar Sisteminə (ÜPS) çıxış əldə ediblər, - çərşənbə günü Azərbaycanın İqtisadi İnkişaf Nazirliyindən bildiriblər. Azərbaycan ilk dəfə olaraq 2008 - ci il yanvarın 1- də digər 10 ölkə ilə eyni vaxtda Norveçin ÜPS Proqramına daxil olub.
Mayda Norveç tərəfi sistemin yeni qaydalarını təsdiqləyib. Lakin Azərbaycanın bu Proqrama daxil olmasına baxmayaraq, ölkə bu qaydalardan istifadə üçün Norveçə bəzi məlumatları təqdim etməlidir. Bununla əlaqədar olaraq İqtisadi İnkişaf Nazirliyi zəruri məlumatları hazırlayıb və iyulda Norveç səfirliyinə təqdim edib.
Bundan sonra Nazirliyə Norveçin Gömrüklər və Aksizlər İdarəsindən Azərbaycanın Norveçin ÜPS Proqramında ÜPS-in aktiv hala gətirildiyi barədə məlumat daxil olub.
Hazırda Müstəqil Dövlətlər Birliyi (MDB) ölkələrindən yalnız Azərbaycan və Gürcüstan üçün Norveçin ÜPS Proqramı qüvvədədir
Proqramda bəzi məhsullar üçün hətta yüz faizə qədər tarif güzəştləri nəzərdə tutulur.
Güzəştlərdən faydalanmaq istəyən ixracatçılar güzəşt tətbiq edilən məhsulların Azərbaycan mənşəli olduğu barədə İqtisadi İnkişaf Nazirliyi yanında İstehlak Bazarına Nəzarət üzrə Dövlət Xidmətindən mənşə sertifikatını almaları zəruridir.
Azərbaycan Avropa İttifaqı, Kanada, Yaponiya və Türkiyənin Proqramlarından da istifadə edir. Apreldə Azərbaycanın İqtisadi İnkişaf Nazirliyi ABŞ -ın ÜPS Proqramında iştirak üçün bu ölkənin ticarət nümayəndəliyinə müraciət edib.
