Azərbaycan, Bakı, 22 avqust/ Trend , müxbir İ.Xəlilova/ Dünya Bankı (DB) Bakıda bərk məişət tullantılarının kompleks idarəçiliyi tədbirlərinin realizəsi üzrə xərclərin 70 faizdən çox hissəsini öz üzərinə götürməyə hazırdır. Ölkənin İqtisadi İnkişaf Nazirliyindən (İİN) cümə günü bildiriblər ki, bankın ekspertləri tullantıların ətraf mühitə təsirinin qiymətləndirilməsindən sonra $41,5 mln. dəyərində layihə hazırlayıblar. Bunun $29,5 milyonu DB-nin krediti hesabına maliyyələşdiriləcək.
Layihənin məqsədi bərk məişət tullantılarının yığılması və utilizasiyası əməliyyatlarını davamlı və səmərəli sistemə çevirmək üçün aparılan islahata yardım etməkdir.
Layihə 5 komponentdən ibarətdir. "Tullantıların toplanması üçün avadanlıq" komponenti üzrə Bakının ən zəif xidmət göstərilən ərazilərində bərk məişət tullantılarının toplanmasının miqyasını və xidmətin səmərəliliyini artırmaq üçün təcili tələb olunan avtonəqliyyat vasitələrinin və zibil konteynerlərinin alınması planlaşdırılır.
Balaxanı qəsəbəsindəki poliqonun təkmilləşdirilməsi və idarə edilməsinə dair ikinci komponent çərçivəsində, bərk məişət tullantılarının idarə edilməsi üzrə ətraf mühitə göstərilən təsirə nəzarət etmək, mövcud poliqonun səmərəliliyinin artırılması və müasir standartlara cavab verməsi üçün müvafiq avadanlığın və texnikanın tədarükü (körpü tərəziləri, buldozerlər və s.) və tikinti işləri (hasarlama, tullantıların basdırılması, drenaja nəzarət, daxili yollar və s.) həyata keçiriləcək. Poliqonun təkmilləşdirilməsi ilə yanaşı, onun yaxın gələcəkdə bağlanmasına hazırlıq işləri görüləcək, yeni müasir poliqonlar tikiləcək.
Layihənin institusional islahat, potensialın artırılması və layihənin idarə olunmasını nəzərdə tutan üçüncü komponenti üzrə strateji planlaşdırmanın tamamlanması və "Təmiz Şəhər" ASC-nin yaradılmasını planlaşdırılır. Müəssisənin gələcək fəaliyyətinin dəstəklənməsi üçün bu sahədə beynəlxalq təcrübəyə malik xarici mütəxəssis, həmçinin, müxtəlif spesifik məsələlər üzrə bir sıra mütəxəssislərin cəlb edilməsi də nəzərdə tutulur. Hazırda İqtisadi İnkişaf Nazirliyi tərəfindən cəlb edilmiş İngiltərənin "Currie & Brown" şirkəti Abşeron yarımadasında tullantıların idarə olunması sisteminin təkmilləşdirilməsinə dair qısamüddətli Tədbirlər Planı hazırlayır.
Layihə çərçivəsində sektorun maliyyə, əməliyyat və hüquqi baxımından yenidənqurulmasını ətraflı şəkildə təsvir edəcək uzunmüddətli Tədbirlər Planı hazırlanacaq. Nəticədə, "Təmiz Şəhər" ASC-nin korporativ strukturu yaradılacaq.
Dördüncü komponent çərçivəsində, Bakı ərazisindəki icazəsiz zibilliklərin bağlanması və təmizlənməsi, digər poliqonların idarəçiliyinin təkmilləşdirilməsinin maliyyələşdirilməsi nəzərdə tutulub.
Layihədən sonrakı investisiyaların texniki hazırlığı komponenti üzrə miqyası genişlənmiş tullantıların toplanması sisteminin səmərəliliyini saxlamaq üçün yükboşaltma məntəqələri yaradılacaq, yeni tullantı poliqonlarının yaradılması üçün zəruri olan texniki-iqtisadi əsaslandırma hazırlanacaq və ətraf mühitə təsirini qiymətləndiriləcək.
Hazırda Bakıda Sabunçu, Suraxanı və Qaradağ rayonları ərazisində yerləşən üç poliqon fəaliyyət göstərir. Onlardan ən böyüyü 1963 - cü ildən fəaliyyət göstərən tullantıların zərərsizləşdirilməsi üzrə Balaxanı qəsəbəsindəki poliqondur. Rəsmi məlumatlara əsasən, paytaxtda zibilin yığılması üzrə 2540 məntəqə mövcuddur.
Hər il Bakı üzrə adambaşına, orta hesabla. 350 kq tullantı yığılır.
Avqustun 22-nə olan rəsmi məzənnə -- 0,8129 AZN/USD.
Müəlliflə əlaqə saxlamaq üçün elektron ünvan: [email protected]