Azərbaycan, Bakı, 26 avqust/ Trend , müxbir Ü.İsmayılova/ "Azersun Holding" Azərbaycanda tibbi ehtiyaclar üçün spirtin çəkilməsi və satışı üzrə işə başlamağa hazırlaşır, - çərşənbə axşamı İmişli şəkər zavodunun rəhbəri İsmayıl Müslümzadə deyib. Yeni müəssisə kompleksin tərkibinə daxil olacaq.
"Zavod Kənd Təsərrüfatı Nazirliyindən lisenziyanı artıq alıb və yaxın vaxtlarda Azərbaycanın Səhiyyə Nazirliyindən lisenziyanın alınması gözlənilir. Bundan sonra zavod işinə başlayacaq", - Müslümzadə deyib.
Bü müəssisənin gücü sutkada üç ton spirt təşkil edəcək. Zavodda Almaniya istehsalı olan avadanlıq quraşdırılıb. Müəssisənin dəyəri 2 mln. avroya yaxındır.
"Azersun Holding" 1992-ci ildə yaradılıb. Holdinqin fəaliyyət dairəsi - çay, bitki yağı emalı və paketlənməsi, ticarət və distribütorluq, tikinti, bank işi, sığorta, karton-kağız, ət və tərəvəz məmulatlarının istehsalı, yüklərin daşınması və saxlanılmasıdır.
