Gürcüstan, Tbilisi, 02 sentyabr/ Trend , müxbir N.Kirtsxaliya/Almaniya şirkəti, dünyada ən iri sement istehsalçılarından biri HeidelbergCement bəyan edib ki, gürcü -osetin münaqişəsi şirkətin Gürcüstanda yerləşən müəssisəsinə 200 min avro zərər vurub.
Şirkətin rəhbəri Maynhard Tul çərşənbə axşamı keçirilən brifinqdə bəyan edib ki, Rusiya təyyarələri Heidelberg Cement-ə məxsus və Kasp sement zavoduna bomba zərbələri endiriblər, elektrokabinələr zədələnib.
"Lakin bilavasitə zavoda zərər vurulmayıb və bu, şirkətə fəaliyyətini davam etdirmək imkanı verir", - Tul bildirib.
Onun sözlərinə görə, Gürcüstanda münaqişənin başlaması ilə zavod fəaliyyətini müvəqqəti dayandırıb və bu səbəbdən buraxılmış gəlir artıb.
Maynhard Tul qeyd edib ki, şirkət Gürcüstandakı fəaliyyətini dayandırmaq niyyətində deyil və ölkə iqtisadiyyatına sərmayələrin yatırılmasına davam edəcək.
"2008 - ci ildə Gürcüstan iqtisadiyyatına 20 mln. lari vəsait yatırmaq planlaşdırılır", - Tul bildirib. Son iki il ərzində sərmayələrin həcmi 350 mln. lari olub.
Tul bilavasitə müəssisənin fəaliyyətində yaranmış çətinliklərə də toxunub. Onun sözlərinə görə, dəmiryol vaqonlarının çatışmaması ilə əlaqədar Heidelberg Cement-in nəqletmə ilə problemləri yaranıb. Tulun sözlərinə görə, Gürcüstan Dövlət Dəmir Yolu vaqonları Heidelberg Cement-in rəqiblərinə erməni və Türkiyə şirkətlərinə verib.
"Yüklərin uzaq məsafələrə nəql edilməsindən böyük mənfəət əldə edən Gürcüstan Dövlət Dəmir Yolunun mövqeyi aydındır. Biz qısa məsafələrə daşınmalar həyata keçiririk. Bu səbəbdən, vaqon çatışmazlığı ilə əlaqədar problemləri həll etmək üçün həm dəmir yolu, həm də iqtisadi inkişaf nazirliyi ilə danışıqlar aparılır", Tul bildirib.
Heidelberg Cement-in əsas səhmdarı Almaniyanın Spohn Cement şirkətidir (75 faiz iştirak payı).
Müəlliflə əlaqə saxlamaq üçün elektron ünvan [email protected]