Azərbaycan, Bakı, 09 sentyabr/ Trend , müxbir Ü.İsmayılova/Azərbaycanda inflyasiyanın səviyyəsi illik hesablamada 29,20 faiz olub, - çərşənbə axşamı İTM QHT-dən bildiriblər.
Təşkilatın öz hesablamalarına əsasən, yanvar-avqustda ölkədə inflyasiyanın səviyyəsi 16,76 faiz təşkil edib.
Avqustda Azərbaycanda istehlak qiymətləri indeksi (İQİ) 1,02 faiz, Bakıda 0,91 faiz, regionda isə 1,13 faiz olub. Əmtəə qrupları üzrə ən yüksək inflyasiya səviyyəsi ərzaq məhsullarında 1,17 faiz müşahidə olunub. Tədqiqat aparılan dövr ərzində inflyasiya səviyyəsi qeyri-ərzaq məhsulları üzrə - 0,76 faiz, xidmət üzrə isə 0,96 faiz təşkil edib.
Aparılmış statistik müşahidə nəticəsində məlum olub ki, bu ilin avqustunda ən çox bahalaşma ərzaq məhsulları üzrə - şəkər tozu (18,40 faiz), meyvə şirəsi (7,94 faiz), şəkər (7,73 faiz), günəbaxan və qarğıdalı yağlarında (4,19 faiz) olub.
Qeyri-ərzaq məhsulları üzrə - oyuncaq maşınlar (2,57 faiz), məktəbli çantaları (2,22 faiz), laminat parket (0,98 faiz) bahalaşıb.
Xidmət üzrə isə - çilingər xidmətləri (7,31 faiz), mebel və digər əmlakın daşınması xidmətləri (6,77 faiz) bahalaşıb.
Ən çox ucuzlaşma ərzaq məhsulları üzrə - yer xiyarı (7,80 faiz), yumurta (5,79 faiz), buğda unu (516 faiz), sümüklü mal əti (0,97 faiz), sümüklü qoyun əti (0,92 faiz) olub.
Ölkə regionlarında ən çox bahalaşma Şəki şəhərində (2,85 faiz), ucuzlaşma isə, Bakı şəhərinin Nərimanov rayonunda -0,40 faiz qeydə alınıb.
2008-ci ilin avqustunda minimum istehlak səbətinin dəyəri - əmək qabiliyyətli əhali üçün 109,61 manat, uşaqlar (0-15 yaşlı) üçün-99,43 manat, pensiyaçılar üçün - 80,97 manat təşkil edib.